İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 503 Hüküm no: 386 Orijinal metin no: [122b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzak Fernandes ve Abraham Ateyes’in zimmetlerinden ibra olduğu Fransa’ya tâbi‘ Portekiz keferesi tüccârından olup hâlâ medîne-i İzmir’de sâkin İzak Fernandes v. David ve şerîki Abraham Atiyes v. Moyise nâm müste’menler taraflarından husûs-ı âti’z-zikre vekîl olduğu Fransa [e]lçisinin baştercümanı olan Corci v. Fonseta ve tüccârdan Safabeta v. İlya şehâdetleriyle şer‘an sâbit olan Fransa müstemenlerinden Fransız Kocu v. Cuvan nâm müstemen meclis-i şer‘-i şerîf-i enverde Havâss-ı Aliyye kazâsı muzâfâtından kasaba-i Hasköy’de Keçeci mahallesinde sâkin işbu râfi‘u’l-vesîka İsak v. Yako ve şerîki Abraham v. David nâm Yahudiler muvâcehelerinde bi’l-vekâle ikrâr-ı tâm ve takrîr-i kelâm edip müvekkillerim mezbûrân İzak Fernandes ve Abraham Ateyes’in yedlerinde müştereken ve makbuz, her birinin levn ve zirâ‘ı beynlerinde ma‘lûm çuka ve kumaş ve hâre ve bürüncük bahâlarına işbu mezbûrân İsak ve Abraham zimmetlerinde ba‘de küll-i hesâb altı bin iki yüz yirmi beş kuruş hakları olup meblağ-ı mezbûrdan her biri âharın zimmetine lâzım gelen mikdâr meblağa emr ve kabûlü hâviye kefâlet-i sahîha-i şer‘iyye ile kefîl olmuşlar idi. Hâlâ mezbûr Abraham gāib ani’l-meclis Harsa nâm Yahûdî ile merkūm Hasan Paşa vakfından icâre-i mu‘accele ve müeccele ile ani’l-iştirâki’s-seviy taht-ı tasarruflarında olup zikrolunan Keçeci mahallesinde vâki‘ bir tarafdan Yahûdî senâvîsi ve bir tarafdan el-Hâc Kaya odaları ve bir tarafdan sâhil-i bahr ile mahdûd buyût-ı adîde ve kayıkhâneyi müştemil Yahûdîhâne olan nısf hisse şâyi‘asına bâ-izn-i mütevellî sekiz yüz kuruş bedel mukābelesinde bana ferâğ ve tefvîz ben dahi müvekkillerim mezbûrân için bi’l-vekâle tefevvüz ve kabûl eylediğimden sonra bedel-i ferâğ olan meblağ-ı mezbûr deyn-i mezkûrun sekiz yüz kuruşuna takās ben dahi ba‘de’l- me’zûn ve’l-kabûl deyn-i mezbûrun mâ‘adâsı olan beş bin dört yüz yirmi beş kuruşu mezbûrândan taleb ve da‘vâ eylediğimde beynimizde ba‘de’l-münâza‘a muslihûn tavassut edip da‘vâ-yı mezbûremden merkūmân ile dört yüz zira‘ sâde hâre ve iki yüz zirâ‘ elvan çuka ve yüz elli zirâ‘ hatâyî ve inci askılarıyla bir çift zümrüd küpe ve beş aded yüzük üzerlerine beynimizde akd-i musâlaha olundukta ben dahi sulh-i mezbûru kabûl ve bedel-i sulh olan eşyâ-yı mezkûreleri yedinden bi’t-tamam ahz u kabz edip meblağ-ı mezbûr ve târih-i kitâba gelince beynimizde cereyân eden sâir ahz ve i‘tâya müte‘allik âmme-i da‘vâdan mezbûrân İsak ve Abraham’ın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim. Min-ba‘d mezbûrân ile vechen mine’l-vücûh da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî gurre-i Zilkade sene [1]107 Şuhûdü’l-hâl: Nasuh Bey b. Mehmed, Yakub Bey Çukadâr-ı müşârün-ileyh, Hüseyin Bey b. Sâdık tâbi‘-i müşârün-ileyh, İbrahim Çelebi b. Ahmed, Halil Efendi b. Mehmed, Ali Beşe Çukadâr, Mustafa b. Şaban, Rombo tüccârdan, Fahrimon tüccârdan, Arnaven tüccârdan.