İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 504 Hüküm no: 387 Orijinal metin no: [122b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın boşadığı karısı Ayşe Hatun’a üç yüz on kuruş mehr-i müecceli ödemesi Mahmiye-i İstanbul’da Güngörmez mahallesi sâkinlerinden olup zâtını ma‘rifet-i şer‘iyye ile ârifân hâlâ zevci Nebi Ağa b. Mustafa ve Mehmed Çavuş b. Hasan ta‘rîfleriyle mu‘arrafe olan Âişe bt. Ali nâm hatun dîvân-ı kāim-makām-ı hazret-i sadrazamîde ma‘kūd meclis-i şer‘-i şerîf-i enverde sâbıkā zevci olan Mustafa [123a] Ağa b. Yusuf nâm kimesne mahzarında üzerine da‘vâ ve takrîr-i kelâm edip mezbûr Mustafa Ağa târih-i kitâbdan on sene mukaddem zevcim olduğu hâlde beni bâyinen tatlîk etmekle zimmetinde mütekarrir ve ma‘kūdün aleyh olan üç yüz on kuruş mehr-i müeccel hakkımı bana edâ etmeyip zimmetinde kalmışdır. Hâlâ suâl olunup meblağ-ı mezbûru bana edâya mezbûra tenbîh olunmak matlûbumdur dedikde gıbbe’s-suâl mezbûr Mustafa Ağa cevâbında müdde‘iyye-i mezbûre Âişe Hatun mukaddem üç yüz on kuruş mehr-i müeccel ile tezvîc olunmuş zevce-i menkûham olmağla müdde‘iyye-i mezbûre Âişe târih-i mezkûrda mehr-i merkūm üç yüz on kuruş üzerine benimle muhâla‘a-i sulhiye-i şer‘iye ile muhâla‘a olup ben dahi sulh-i mezbûru kabûl edip ol vechile mehr-i mezkûr üç yüz on kuruş mutâlebesinden zimmetim berî olmuştur deyü da‘vâyı def‘ edecek gıbbe’l-istintâk ve’l-inkâr mezbûr Mustafa Ağa’dan def‘-i mezbûrûna beyyine taleb olundukda ityân-ı beyyine için istimhâl etmekle kirâren ve mirâren mehl-i şer‘î birle ba‘de’l-imhâl ityân-ı beyyineden izhâr-ı aczile istihlâf etmeğin fi’l-hakīka târih-i mezbûrda mehr-i mezkûr üç yüz on kuruş üzerine zevc-i mezbûr ile muhâla‘a-i sahîha-i şer‘iye ile muhâla‘a etmeyip ol vechile mehr-i merkūm üç yüz on kuruş mütâlebesinden mezbûrun zimmeti berî olmadığına müdde‘iyye-i mezbûre Âişe Hatun’a yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebiyle meblağ-ı mezbûr üç yüz on kuruş müdde‘iyye-i mezbûreye edâ ve îfâya mezbûr Mustafa Ağa’ya tenbîh olunup mâ-hüve’l-vâki‘ bi’t-taleb ketb olundu. Fî 30 min-Zilhicceti’ş-şerîfe sene [1]107 Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām Tezkire-i sânî Hâfız Efendi, Fahrü’l-akrân Mehmed Ağa, Umdetü’l-eşbâh Mehmed Ağa Ser-çavuşân, Halil Efendi b. Mehmed, el-Hâc Ali Beşe b. ( ), Muhzır Ebûbekir Beşe b. Sinan, Muhzırbaşı Mehmed Ağa, Mehmed Çavuş el-Mübâşir.