İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 505 Hüküm no: 388 Orijinal metin no: [123a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Seyyid İbrahim Çelebi b. Ebubekir’in Silivri’nin Büyük Kılıçlı köyünden Hüseyin Çelebi b. Ömer’den aldığı koyun ve kuzu bedellerini ödemesi Havâss-ı aliyye kazâsı muzâfâtından Silivri nâhiyesine tâbi‘ Büyük Kılıçlı nâm karyede koyun celebi olan işbu râfi‘u’l-kitâb Hüseyin Çelebi b. Ömer nâm kimesne Dîvân-ı kāimmakām-ı hazret-i sadrazamîde ma‘kūd meclis-i şer‘-i şerîfde mahmiye-i İstanbul’da merhûm ve mağfûrun leh Sultan Bâyezid Han aleyhi’r-rahmetü ve’r-rıdvân Câmi‘-i Şerîfi kurbünde kasab olan es-Seyyid İbrahim Çelebi b. Ebûbekir mahzarında üzerine da‘vâ ve takrîr-i kelâm edip bundan akdem yedimde mülküm olan ağnamdan her biri birer kuzularıyla ikişer yüz yetmişer akçeye olmak üzere iki yüz yirmi re’s kuzulu marye koyunlarım elli dokuz bin dört yüz akçeye ve her biri yüz altmış akçeye olmak üzere yüz on yedi re’s kısır koyunlarımı yirmi bin beş yüz doksan iki akçeye çobanım işbu hazır bi’l-meclis Selo v. Vakose nâm zimmî yediyle işbu mezbûr es-Seyyid İbrahim Çelebi ile şeriki Veli Beşe nâm kimesneye bey‘ ve teslîm onlar dahi ale’l-iştirâki’s-seviy iştirâ ve kabûl ve zikrolunan koyun ve kuzuları her biri nısfıyet üzere kabz ve teslîm eylediklerinden sonra meblağayn-ı mezbûreyn cem‘an yetmiş dokuz bin dokuz yüz doksan iki akçenin nısfı olup mezbûrun zimmetine lâzım gelen otuz dokuz bin dokuz yüz doksan altı akçeyi mezbûr es-Seyyid İbrahim Çelebi’den taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr es-Seyyid İbrahim Çelebi cevâbında fi’l-hakīka kazıyye bâlâda tafsîl u beyân ve şerh u ayân olunan vech üzere olup zikrolunan koyun ve kuzuları müdde‘î-i mezbûra semen-i mezkûrla şerîk-i merkūm Veli Beşe ile yetmiş dokuz bin dokuz yüz doksan iki akçeye ale’l-iştirâki’s-seviy iştirâ ve teslîm ve zikrolunan koyun ve kuzuların nısfını ahz u kabz etmekle semen-i mezbûrun nısfı olup zimmetine lâzım gelen otuz dokuz bin dokuz yüz doksan altı akçe müdde‘î-i mezbûra el-ân vâcibü’l-edâ deyni idüğini bi tav‘i’s-sâf ikrâr ve i‘tirâf etmeğin alâ mûcib-i i‘tirâfihî meblağ-ı [123b] mezbûr otuz dokuz bin dokuz yüz doksan altı akçeyi müdde‘î-i mezbûra edâ ve îfâya mezkûr es-Seyyid İbrahim Çelebi’ye tenbîh olunup mâ-vaka‘a bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe sene [1]107 Şuhûdü’l-hâl: Umdetü erbâbı’t-tahrîr ve’l-kalem tezkire-i evvel Yusuf Efendi, Zübdetü ashâbı’t-tastîr ve’r-rakām tezkire-i sânî Hâfız Efendi, Umdetü’l-eşbâh ve’l-a‘yân Mehmed Ağa Ser-çavuşân, Fahrü’l-akrân muhzır Mehmed Ağa, Halil Efendi b. Mehmed, el-Hâc Ali Beşe çukadar, Ebûbekir b. Sinan, Muhzırbaşı Mehmed Ağa.