İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 507 Hüküm no: 390 Orijinal metin no: [124a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Ali ile kızları Fâtma ve Ayşe’nin mülkleri olan menzile ait arsa ve bahçenin varislerden Râbia’nın Süleyman Çelebi’ye satışından borcu kalmadığı Husûs-ı âti’z-zikrin mahâllinde ketb ve tahrîri iltimâs olunmağın savb-ı şer‘-i mutahharadan keşf nâibimiz olan fahrü’l-müderrisîni’l-kelâm Abdullah Efendi b. Ali irsâl olunup ol dahi hâssa mi‘mârlardan Mustafa Halîfe b. Abdullah ile mahmiye-i İstanbul’da Elvanzade mahallesinde vâki‘ bir tarafdan Mi‘mâr İsmail Ağa mülkü ve el-Hâc Yusuf menzili ve bir tarafdan tarîk-i hâs ve iki tarafdan tarîk-i âm ile mahdûd menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde menzil-i mahdûd-ı mezbûrun altı sehimden dört sehmi Mehmed Çelebi b. el-Hâc Süleyman nâm kimesnenin mülkü ve birer sehmi sulbiye kızları Fatma ve Ayşe’nin mülkleri ve hakları iken mezbûr Mehmed Çelebi menzil-i mahdûd-ı mezbûrun vâki‘ zikri sebk eden dört sehm-i şâyi‘inin üç sehmini kızı mezbûre Ayşe’nin zevci el-Hâc Salih b. Süleyman nâm kimesneye semen-i ma‘lûm-ı makbûza bey‘ ve temlîk etdiğinden sonnra mezbûr Fatma fevt olup verâseti babası mezbûr Mehmed Çelebi ile vâlidesi Râbia bt. Abdullah nâm hatuna münhasıra olup ba‘dehâ mezbûr Mehmed Çelebi dahi vefât edip verâseti zevce-i metrûkesi mezbûre Râbia’ya ve sulbiye kebîre kızı mezbûre Ayşe’ye münhasıra olup ba‘dehû mezbûr el-Hâc Salih vefât edip verâseti zevce-i metrûkesi mezbûre Âişe ile sulbî kebîr oğlu Süleyman Çelebi’ye ve sulbiye kebîre kızı Hatice’ye münhasıra ve tashîh-i meselesi bi-tarîkı’l-münâsahati’ş-şer‘iyye beş yüz yetmiş altı sehimden olup sihâm-ı mezbûreden iki yüz yetmiş iki sehm mezbûre Ayşe’ye ve elli iki sehm mezbûre Râbia’ya ve yüz yirmi altı sehim mezbûr Süleyman Çelebi’ye ve altmış üç sehm mezbûretân Fatma ve Hatice’den her birine isâbet eylediği şer‘an zâhir ve mütehakkık olduktan sonra zâtı ma‘rifet-i şer‘iye ile ârifân el-Hâc Mesud b. Ömer ve el-Hâc Musa b. Ebûbekir nâm kimesneler ta‘rîfleriyle mu‘arrefe olan mezbûre Râbia meclis-i ma‘kūd-ı mezbûrda sadriye kızı oğlu işbu bâ‘isü’l-kitâb mezbûr Süleyman Çelebi mahzarında ikrâr ve takrîr-i kelâm edip menzil-i mahdûd-ı mezbûrun ebniye-i kadîmesi bin yüz beş senesinde vâki‘ harîkde bi’l-külliye muhterik olup ba‘dehû dâmadım mezbûr el-Hâc Salih ol hînde hayatda olmağla menzil-i mezbûru kendi malıyla binâ etmişidi. Hâlâ menzil-i mezbûrun mi‘mâr-ı mezbûr misâhası üzere ancak sekiz yüz on zirâ‘ arsasından ber-vech-i muharrer 576 sehimden bana isâbet eden elli iki sehim hisse-i şâyi‘amı tarafeynden îcâb ve kabûlü hâvî bey‘-i kat‘î ile mezbûr Süleyman Çelebi’ye kırk kuruşa bey‘ ve temlîk mezbûr Süleyman Çelebi dahi ber-vech-i muharrer iştirâ ve temellük ve kabûl etdiğinden sonra semeni olan meblağ-ı mezbûr kırk kuruş mutâlebesinden mezbûr Süleyman Çelebi’nin zimmetini ibrâ-i âmm-ı râfi‘ü’l-hisâm ile ibrâ ve ıskāt eyledim. Ba‘de’l-yevm menzil-i mahdûd-ı mezbûrun zikrolunan 810 zirâ‘ arsasında kat‘â alâka ve medhalim kalmamışdır dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ma‘an ba‘s olunan Ali Çelebi b. Mustafa ve Mehmed Çelebi b. İbrahim meclis-i şer‘a gelip alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Zilkade sene [1]107 Şuhûdü’l-hâl: eş-Şâhidûne’s-sâbıkūn.