İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 508 Hüküm no: 391 Orijinal metin no: [124a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da kalaycı esnafı kethudalığını usulsüz olarak ele geçiren Seyyid Ahmed’in azliyle yerine eski kethuda Mehmed Beşe’nin kethuda nasbı Mahmiye-i İstanbul’da kalaycı tâifesinin yiğitbaşıları olan usta Ali b. Mustafa ve hâlâ kalaycıbaşı olan Hüseyin Çelebi b. Osman ve ihtiyarlarından el-Hâc İbrahim b. Şaban ve usta Ramazan b. Ebûbekir ve Ali Çelebi b. Mustafa ve usta Salih b. Cafer ve el-Hâc Hüseyin b. İbrahim ve İsa b. Mehmed ve Mehmed b. Mustafa ve Mahmud b. Mustafa ve İsmail b. Veli ve Ali b. İbrahim ve Şaban b. Mahmud ve Ahmed b. Osman ve Bayram b. Mahmud ve Halil b. Fazlullah ve usta Muslu b. Receb ve Abdüsselam b. Fazlı ve Mustafa b. Ramazan ve usta Himmet b. Şaban ve sâyirleri meclis-i şerîf-i enverde yine tâife-i mezbûreden işbu râfi‘u’l-kitâb Mehmed Beşe b. Mustafa mahzarında her biri ikrâr ve takrîr-i kelâm edip mezbûr Mehmed Beşe mukaddemâ kethudâmız olmağla yine tâife-i mezbûreden es-Seyyid Ahmed nâm kimesne mezbûr Mehmed Beşe’yi bir tarîkle azl ve yerine kendüyi kethudâ nasbetdirip lâkin her birimize şütûm-ı galizâ ile şetm eylediğinden mâ‘adâ celb-i mâl ile ta‘cîz ve zulm ve te‘addî etmekle beynimizde ihtilâle bâ‘is ve bâdî olmağın mezbûr es-Seyyid Ahmed kethudâlıkdan ref‘ ve yerine her hâlinden râzı ve şâkir olduğumuz mezbûr Mehmed Beşe’yi ke’l-evvel üzerimize kethudâ ihtiyâr eyledik hâlâ kıbel-i şer‘den dahi merkūm Mehmed Beşe üzerimize kethudâ nasb ve ta‘yîn olunup zabtı’çün vesîka tahrîr olunmak matlûbumuzdur dediklerinde kazıyye vech-i muharrer üzere olduğun vukūfu olan sikāt-ı makbûletü’l-kelimât ihbâr dahi etmeleriyle mezbûr es-Seyyid Ahmed ref‘ ve tâife-i mezbûrenin üzerlerine muhtârları olan mezbûr Mehmed Beşe kıbel-i şer‘den ke’l-evvel nasb ve ta‘yîn olundukda ol dahi merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 23 Zilhicce sene [1]107 Şuhûdü’l-hâl: Mehmed Çelebi b. İbrahim, Halil Efendi b. Mehmed, Mehmed Efendi b. Hasan, Ali Beşe b. Osman, İbrahim Çelebi b. Ahmed, Receb Çelebi b. Süleyman, Mahmud Çelebi b. Mehmed.