İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 509 Hüküm no: 392 Orijinal metin no: [124b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun bt. Abdullah’ın boşandığı kocası Mehmed b. Nasrullah’tan taleb ettiği mehir ve eşyalardan ibra edildiği Mahmiye-i İstanbul’da Dizdâriye mahallesi sâkinelerinden Sâliha Hatun bt. Abdullah ba‘de’t-ta‘rîfi’ş-şer‘î dîvân-ı kāim-makām-ı hazret-i sadrazamîde ma‘kūd meclis-i şer‘i şerîfde zevc-i mutallakı işbu râfi‘u’l-kitâb el-Hâc Mehmed b. Nasrullah nâm kimesne mahzarında üzerine da‘vâ ve takrîr-i kelâm edip mezbûr el-Hâc Mehmed zevcim olup târih-i kitâbdan beş ay mukaddem beni bâyinen tatlîk etmekle zimmetinde mütekarrir ve ma‘kūdün aleyh olan iki bin akçe mehr-i müeccelimin bin akçesin yedinden ahz u kabz edip mâ‘adâsı olan bin akçe mehrim ile bir leğen ve bir ıbrık ve iki yorgan ve bir kahve ıbrığı ve bir bakraç ve bir ocak yaşmağı mezbûrun yedinde kalmışdır. Hâlâ suâl olunup meblağ-ı mezbûr bin akçeyi ve eşyâ-i mezbûre aynı mevcûd ise aynını değil ise ba‘de’s-sübût kıymet-i şer‘iyyesin bana red ve teslîme mezbûr el-Hâc Mehmed’e tenbîh olunmak matlûbumdur dedikde gıbbe’s-suâl mezbûr el-Hâc Mehmed cevâbında târih-i mezbûrda müdde‘iyye-i mezbûreyi tatlîk eylediğimde meblağ-ı mezbûr bin akçe ile eşyâ-i mezbûreyi tamamen ahz u kabz edip mâ‘adâsı olan bin akçeye ve târih-i mezbûra gelince beynimizde cereyân eden sâir ahz ve i‘tâ ve hukūk-ı ma‘lûme ve meçhûleye müte‘allika da‘vâdan zimmetimi ibrâ-i amm-ı kātı‘u’n-nizâ‘la ibrâ ve ıskāt etmişdir deyü da‘vâyı def‘ edicek gıbbe’l-istintâk ve’l-inkâr mezbûr el-Hâc Mehmed’den def‘-i mezbûruna beyyine taleb olundukda udûl-i Müslimînden ve mahalle-i mezbûre sükkânından zât-ı mezbûreyi ma‘rifet-i şer‘iyye ile ârifân olan Hasan Çelebi b. Abdurrahman ve Mustafa Efendi b. Mehmed nâm kimesneler li ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka târih-i kitâbdan beş ay mukaddem işbu mezbûr el-Hâc müdde‘i[yye]-i mezbûreyi tatlîk eylediğinde zikrolunan bir leğen ve bir ıbrık ve iki yorgan ve bir kahve ıbrığı ve bir bakraç ve bir ocak yaşmağını ve meblağ-ı mezbûr bin akçeyi mezbûre Sâliha Hatun bizim huzûrumuzda ahz u kabz edip mâ‘adâsı olan bin akçeye ve târih-i kitâba gelince beynlerinde cereyân eden ahz ve i‘tâ ve hukūk-ı ma‘lûme ve meçhûleye müte‘allik âmme-i da‘vâdan zevci işbu mezbûr el-Hâc Mehmed’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi biz husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘i[yye]-i mezbûr bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fi’l-yevm 28 Zilhicce sene [1]107 Şuhûdü’l-hâl: Tezkire-i evvel Yusuf Efendi, Tezkire-i sânî Hâfız Efendi, Mehmed Ağa Ser-çavuşân, Muhzır Mehmed Ağa, Mehmed Efendi b. Ali, Mehmed Efendi b. Hasan, Mustafa Efendi b. Musa, Monla Mustafa b. Veli, Monla Hasan b. Mehmed, Mehmed Çelebi b. ( ) Çilingir.