İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 510 Hüküm no: 393 Orijinal metin no: [124b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtma Hatun’un boşandığı kocası Mehmed Efendi’den olan oğlu Mustafa için takdir olunan beş paraya ilaveten ihtiyaç duyduğunda yapacağı harcamalar için Mehmed Efendi’ye rücu hakkı verilmesi Mahmiye-i İstanbul’da Mollahüsrev mahallesinde sâkine Fatma bt. el-Hâc İsmail Ağa nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde sâbıkā zevci olan kethudâyeri kâtibi Mehmed Efendi b. Ali mahzarında takrîr-i kelâm ve ta‘bîr-i ani’l-merâm edip zevcim mezbûr Mehmed Efendi beni bâyinen tatlîk etmekle mezbûrun firâşından hâsıl ve benden [mütevellid] oğlum Mustafa nâm sagīrin nafaka ve kisve ve sâir levâzım-ı zaruriye[sine] babası mezbûr Mehmed Efendi üzerine kıbel-i şer‘den meblağ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakki‘-i sadr-ı kitâb tûbâ lehû ve hüsnü me’âb hazretleri bi’t-terâzî sagīr-i mezbûr Mustafa’nın nafaka ve kisve ve sâir levâzım-ı mühimmesi’çün babası mezbûr Mehmed Efendi târih-i kitâbdan yevmî beş para farz ve takdîr edip meblağ-ı mefrûz-ı mezbûr yevmî beş parayı sagīr-i mezbûrun ber-vech-i muharrer levâzım-ı mühimmesine harç ve lede’l-iktizâ istidâneye ve inde’z-zafer babası mezbûr Mehmed Efendi üzerine rücû‘a mezbûre Fatma Hatun’a izin verilmeğin mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Zilhicce li-sene seb‘a ve mie ve elf. Şuhûdü’l-hâl: Fahrü’l-eşbâh Veyis Ağa b. Osman, Hüseyin Efendi b. el-Hâc Hüseyin, Halil Efendi b. İbrahim, Mehmed Efendi b. Abdülkadir Efendi, Abdüllatif Efendi b. el-Hâc Mahmud Efendi, Ali Efendi b. el-Hâc Mehmed, İbrahim Çelebi b. Abdullah, Ali Ağa b. Ömer.