İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 511 Hüküm no: 394 Orijinal metin no: [124b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hatun’un boşandığı kocası ile Mehmed Efendi’nin oğlu Mustafa’nın nafakası dışında bir bağları kalmadığı Husûs-ı âti’z-zikrin mahâllinde ketb ve tahrîri iltimâs olunmağın savb-ı şer‘-i mutahharadan irsâl olunan fahrü’l-müderrisîn İbrahim Efendi b. Mehmed el-Hamîdî mahmiye-i İstanbul’da Mollahüsrev mahallesinde sâkin dergâh-ı âlî yeniçerileri ocağında sâbıkā kethudâyeri kâtibi olan fahrü’l-eşbâh ve’l-ekfâ Mehmed Efendi b. Ali’nin menziline varıp zeyl-i vesîkada [125a] muharrerü’l-esâmî Müslimîn huzûrlarında akd-i meclis-i şer‘-i Nebevî eyledikde mezbûr Mehmed Efendi’nin zevcesi Fatma Hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân er karındaşı el-Hâc Mehmed Efendi ve Halil Efendi ile İbrahim nâm kimesne şehâdetleriyle şer‘an sâbit ve sübût-ı vekâletine hükm-i şer‘î lâhık olan babası el-Hâc İsmail Ağa b. İbrahim meclis-i ma‘kūd-ı mezbûrda mezbûr Mehmed Efendi mahzarında bi’l-vekâle ikrâr-ı tâm ve takrîr-i kelâm edip mezbûr Mehmed Efendi zevce-i müvekkilem mezbûreyi beynlerinde hüsn-i zindegâneleri olmamağla bâyinen tatlîk etmeğin zimmetinde mütekarrir ve ma‘kūdün aleyh olan kırk beş bin akçe mehr-i müeccelimi ve nafaka-i iddet-i mu‘ayyene ve meûnet-i süknâm içün bi’t-terâzî üç bin akçe ki cem‘an kırk sekiz bin sâğ akçeyi işbu meclis-i ma‘kūd-ı mezbûrda merkūm Mehmed Efendi bana def‘ u teslîm ben dahi bi’l-vekâle bi’t-tamam yedinden ahz u kabz edip ba‘de’l-yevm mezbûr Mehmed Efendi’nin firâşından hâsıl ve kızım mezbûre Fatma’dan mütevellid sadrî oğlu Mustafa nâm sagīrin nafakasından mâ‘adâ hukūk-ı zevciyete ve gayrıya müte‘allika kızım mezbûrenin mezbûr Mehmed Efendi ile vechen mine’l-vücûh da‘vâ ve nizâ‘ları kalmamışdır dedikde gıbbe’t-tasdîkı’ş-şer‘î vâki‘ hâli mevlânâ-i mezbûr mahâllinde ketb ve tahrîr ba‘dehû ma‘an irsâl olunan İbrahim b. Mehmed ve Receb b. Süleyman ile meclis-i şer‘a gelip alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmî’s-sânî ve’l-işrîn sene [1]107 Şuhûdü’l-hâl: Umdetü’l-meşâyih Mu‘abbir Abdulkadir Efendi b. Süleyman, Abdüllatif Efendi b. eş-Şeyh Mahmud, Fahrü’l-eşbâh Veyis Ağa b. Osman, Kâtib-i Mevkūfât el-Hâc Hüseyin Efendi b. Hasan, Halil Efendi b. İsmail, Ali Efendi b. eş-Şeyh Mehmed, İbrahim Çelebi b. Abdullah, Ali Ağa b. Ömer, Mehmed Efendi b. Abdülkadir Efendi.