İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 512 Hüküm no: 395 Orijinal metin no: [125a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeniçeri ocağında başyazıcı iken muharebede kaybolan Ali Yazıcı b. Yusuf’un terekesi mîrî tarafından zabtolunduğu için Ahmed Beşe’nin alacak davasının menedilmesi Dergâh-ı âlî yeniçerilerinin yetmiş ikinci cemâ‘atine mahsûs oda yoldaşlarından olup mahmiye-i İstanbul’da misâfiren sâkin olan hâlen mahrûse-i Edirne’de Sultan Selim kurbünde taş odalarda sâkin Ahmed Beşe b. Mehmed meclis-i şer‘-i şerîf-i enverde dergâh-ı âlî yeniçerileri ocağında başyazıcı iken merkūm Köprülüzâde Mustafa Paşa şehîden fevt olduğu muhârebede gāib olan Ali Yazıcı b. Yusuf’un karındaşı işbu râfi‘u’l-kitâb İbrahim Çelebi b. Yusuf mahzarında üzerine da‘vâ ve takrîr-i kelâm edip bin doksan dokuz senesinde mahrûse-i Edirne sahrâsında Selanik’de yeniçeri çukası emâneti alıverilmek içün mezbûr Ali Yazıcı’ya malımdan bin elli kuruşumu def‘ u teslîm ol dahi yedimden ahz u kabz ve hizmet-i mezbûreyi alıvermeyip meblağ-ı mezbûru mezbûr Ali Yazıcı’dan kable’l-ahz gāib olup zimmetinde kalmağın hâlâ mezbûr İbrahim Çelebi mezbûr Ali Yazıcı’nın karındaşı olmağla taleb ederim suâl olunup alıverilmesi matlûbumdur dedikde müdde‘î-i mezbûrun takrîr-i meşrûhu üzere merkūm Ali Yazıcı mefkūd olup hayat [ve] memâtı nâ ma‘lûm olmağla mezbûr Ali Yazıcı’nın fevtini ve terekesine mezbûr İbrahim Çelebi’nin vaz‘-ı yedini iddi‘â etdiğinden mâ‘adâ mezbûr Ali Yazıcı vech-i meşrûh üzere mefkūd oldukda kalîl ve kesîr ve celîl ve hakīr eşyâsı ve zimem-i nâsda olan hukūku tahsîl olundukda elli üç bin doksan altı kuruşa bâliğ olmağla meblağ-ı mezbûr bâ-fermân-ı âlî cânib-i mîrîden kabz olunup veresesi yedlerinde bir habbe kalmayıp eşyâsından bir nesneye vaz‘-ı yedleri olmamağla hâricden ba‘zı kimesnelerin mezbûr Ali Yazıcı’ya ma‘lûmü’l-mikdâr şey vermişidik zimmetinde kalmışidi deyü iddi‘âları istimâ‘ olunmayıp men‘ ve def‘ olunmak bâbında mezbûr İbrahim Çelebi yedinde müt‘addid emr-i şerîf-i cihân-mutâ‘ dahi olmağla müdde‘î-i mezbûr Ahmed Beşe’nin da‘vâsını istimâ‘a bir vechile mesâğ olmamağın mûcebiyle mezbûr Ahmed Beşe bî-vech mu‘ârazadan men‘ olunup mâ-vaka‘a ketb olundu. Min 25 Zilhicce sene [1]107 Şuhûdü’l-hâl: el-Hâc Mustafa Efendi b. el-Hâc Ahmed, İbrahim b. el-Hâc Ahmed, Küçük İbrahim Çelebi b. Mehmed, el-Hâc İbrahim Efendi b. Mehmed, Receb b. Süleyman, Ahmed b. Ahmed, Mehmed Çelebi b. İdris ve gayruhum.