İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 513 Hüküm no: 396 Orijinal metin no: [125a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç esnafı kethudası Süleyman Çelebi’nin saraçhaneye bitişik dükkânların saraç esnafına icara vermesi için tenbih olunması Hâlâ rikâb-ı hümâyûn-ı şevket-makrûnda sadâret-i uzmâ ve vekâlet-i kübrâ kāim-makāmı olan düstûr-ı zî-şân-ı vezîr-i âsaf-nişân râkib-i huyûlü’l-izz-i ve’l-ikbâl sahib-i züyûli’l-mecd-i ve’l-iclâl sa‘âdetlü Hasan Paşa hazretlerinin mühürdârlıkları hizmetleriyle şeref-yâb olan umdetü’l-eşbâh ve’l-a‘yân Hasan Ağa b. Abdülmennan tarafından husûs-ı âti’z-zikre vekîl-i müsecceli olan Abdullah Ağa b. Abdullah meclis-i şer‘-i şerîf-i enverde Saraçhâne-i Kebîr’de vâki‘ [125b] saraç tâifesinin kethudâları olan Süleyman Çelebi b. Ramazan nâm kimesne mahzarında üzerine da‘vâ ve takrîr-i kelâm edip Ayasofya-i Kebîr Evkāfından icâreteyn-i ma‘lûmeteyn ile müvekkilim merkūm Hasan Ağa’nın taht-ı tasarrufunda olup zikrolunan Saraçhâne-i Kebîr’in başkapısına muttasıl iki kepenk dükkân Saraçhâne-i mezbûrun mülhakātından olduğundan mâ‘adâ mukaddemâ saraç tâifesine îcâr olunmağla dükkân-ı mezbûrda saraç tâifesi sâkin olagelmişiken kethudâ-i mezbûr Süleyman Çelebi saraçhâne-i mezbûrdan gayrı mahallerde saraç tâifesi sâkin olmak memnû‘dur deyü dükkân-ı mezbûr âhar sûkda olmak üzere saraç tâifesine îcâra ve bilâ-vech-i şer‘î mâni‘ olur hâlen suâl olunup zikrolunan dükkânı saraç tâifesine îcârıma mâni‘ olmamak üzere mezbûr Süleyman Çelebi’ye tenbîh olunmak bi’l-vekâle matlûbumdur dedikde gıbbe’s-suâl kethudâ-i mezbûr Süleyman Çelebi cevâbında dükkân-ı mezbûr saraçhâne-i merkūmun başkapısına muttasıl olmağla mülhakātından olduğunu ve mukaddemâ saraç tâifesine îcâr olunmağla saraçhâne-i mezbûrun taşrasında olan saraç tâifesi gibi dükkân-ı merkūmda dahi saraç tâifesi sâkin olageldiğini tâyi‘an ikrâr ve i‘tirâf etmeğin alâ mûcib-i i‘tirâfihî dükkân-ı mezbûrda ke’l-evvel saraç tâifesi sâkin olup bî-vech dahletmemek üzere kethudâ-i mezbûr Süleyman Çelebi’ye tenbîh olunup mâ-vaka‘a bi’t-taleb ketb olundu. Fî 25 Zilhicceti’ş-şerîfe sene 1107 Şuhûdü’l-hâl: Fahrü’l-akrân Mustafa Ağa b. Receb, Receb Efendi Ser-muhzırân, el-Hâc Celil Efendi b. Mehmed, el-Hâc Ali Beşe b. el-Hâc Ebûbekir, Yiğitbaşı Mustafa Çelebi, Hüseyin Çelebi b. Mehmed, es-Seyyid İsmail Çelebi.