İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 515 Hüküm no: 398 Orijinal metin no: [126a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Mürsel’e ait evin içini görmeleri sebebiyle Yorgi, Kankar, Kostantin ve Parize’nin pencerelerinin tahta perde ile yükseltilmesi Husûs-ı âti’l-beyânın mahâllinde ketb ve tahrîri bâbında fermân-ı âlî vârid olmağın imtisâlen leh savb-ı şer‘-i mutahharadan keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mârlardan Dede Mehmed Halîfe b. İshak ve Mustafa Halîfe b. Abdülmennan ile mahmiye-i İstanbul’da Ali Paşa-yı Atîk mahallesi sâkinelerinden işbu bâ‘isü’l-kitâb es-Seyyid Ali Çelebi b. Mürsel nâm kimesnenin menziline varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde mezbûr es-Seyyid Ali Çelebi meclis-i ma‘kūd-ı mezbûrda yine mahalle-i mezbûre sâkinlerinden Yorgi v. Dimitraki ve Kankar v. Anaştaş ve Kostantin v. Aleksan nâm zimmîler ve Parize bt. Preşkova nâm Nasrâniye muvâcehelerinde da‘vâ ve takrîr-i kelâm edip mezbûr Yorgi’nin üç aded pencerelerinin ve mezbûr Kankar’ın bir aded penceresinin ve mezbûr Kostantin’in üç aded penceresinin ve mezbûre Parize’nin üç aded penceresinin benim işbu menzilimin makarr-ı nisvân olan mevâzi‘ına havâleleri olmağla kadîmden tahta havâle perdeleri olup mürûr-ı eyyâm ile harâb olmağla nazar olunup her birinin havâlelerini vaz‘-ı kadîmi üzere def‘a tenbîh murâd eylerim dedikde ba‘de’l-keşf ve’l-mu‘âyene zikrolunan pencerelerin mezbûr es-Seyyid Ali Çelebi’nin menzilinin makarr-ı nisvân olan mevâzi‘ına havâleleri olduğu zâhir ve mütahakkık olup mezbûrûn Yorgi ve Kankar ve Kostantin ve Parize suâl olunduklarında her biri kadîmden tahta havâle perdeleri olduğunu bi’t-tav‘i’s-sâf ikrâr ve i‘tirâf etmeğin vaz‘-ı kadîmi üzere havâlelerini def‘a ba‘de’t-tenbîh vâki‘ hâli mevlânâ-yı mezbûr mahâllinde ba‘de’t-tahrîr ma‘an ba‘s olunan Mehmed Çelebi b. İbrahim ve Yusuf b. Abdurrahim ile meclis-i şer‘a gelip alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe sene [1]107 Şuhûdü’l-hâl: İbrahim Efendi b. Ali el-imâm, İsmail Halîfe b. Süleyman el-müezzin, Ali Dede b. Mustafa, Halil Çelebi b. Halil, Salih Çelebi b. Seyfi, Yusuf Çelebi b. Ahmed.