İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 524 Hüküm no: 405 Orijinal metin no: [129b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Ali Ağa’nın menzilini zevcesi Saime bt. Abdullah’a verdiği Husûs-ı âti’z-zikrin mahâllinde ketb ü tahrîri iltimâs olunmağın savb-ı şer‘den irsâl olunan fahrü’l-müderrisîn İbrahim Efendi b. Mehmed el-Hamîdî mahmiye-i İstanbul’da Mustafa Bey mahallesinde sâkin hâlâ şeyh-i meşâyihi’l-islâm sellemehü’s-selâm hazretlerinin nezâret-i aliyyelerinde olan evkāflarından merhûm ve mağfûrun leh Sultan Bâyezid Han aleyhi’r-rahmeti ve’l-gufrân hazretlerinin vakfına bi’l-fi‘il mütevellî olan umdetü’l-eşbâh ve’l-a‘yân kethudâ Elhâc Hasan b. Ali Ağa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘ eyledikde mûmâ-ileyh Elhâc Hasan Ağa meclis-i ma‘kūd-ı mezbûrda hâlâ zevce-i menkûhası Saime bt. Abdullah nâm hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iye ile ârifân Ahmed Efendi b. Ali ve Mehmed Bey b. Abdullah şehâdetleriyle şer‘an sâbit olan Elhâc Osman Ağa b. Ali mahzarında ikrâr-ı tâm ve takrîr-i kelâm edip, zevce-i mezbûre Saime’nin yedinde mülk ü hakkı olup mahalle-i mezbûrede vâki‘ işbu bir tarafdan ba‘zen sâbıkâ İstanbul kadısı olan a‘lamü’l-ulemâi’l-izâm Mehmed Efendi hazretleri mülkü ve ba‘zen Süleyman Beşe veresesi mülkleri ve bir tarafdan İmâm Hüseyin Efendi Vakfı olan menzil ve iki tarafdan tarîk-i âm ile mahdûd buyût-ı adîdeyi müştemil menzili bin yüz beş senesinde vâki‘ harîkde muhterik olmağın, mezbûre Saime’nin emriyle malımdan işbu dâhiliyede vâki‘ iki bâb fevkānî oda ve bir sofa ve kenîf ve bir kebîr dehliz ve tahtânî bir oda ve bir kiler ve kenîf ve sofa ve matbah ve hâriciyede bir sagīr kahve odası müceddeden binâ ve ihdâs ve masrûfum sekiz yüz guruşa bâliğ olmuşidi el-hâletü hâzihî meblağ-ı mezbûr sekiz yüz kuruşa müte‘allika âmme-i da‘vâdan mezbûre Saime Hatun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm zikrolunan binâda kat‘a alâkam kalmayıp mezbûre Saime’nin mülküdür dedikde gıbbe’t-tasdîkı’ş-şer‘ mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilhicce li-sene [1]107 Şuhûdü’l-hâl: Ahmed Efendi b. Mehmed imâm-ı mahalle-i mezbûr, Mehmed Efendi b. Ömer, Halil Paşa İmâmı Mehmed Efendi b. Bektaş, Süleyman Ağa b. Abdullah, Halil Paşa Müezzini Yusuf Efendi b. Abdullah, Müezzin Mustafa b. Mehmed, İbrahim b. Mustafa Müezzin-i Halilpaşa, Salih Efendi b. Mustafa mü’ezzin-i mahalle-i mezbûr, Süleyman Çelebi b. Abdullah Câbî Halil Paşa.