İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 525 Hüküm no: 406 Orijinal metin no: [129b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstemihan Hatun’un menzili Osman Efendi b. İsmail’e tevcih olunduğu Ashâb-ı hayrâtdan merhûme İsmihan Hatun’un süknâsı ulemâdan bir recül-i sâliha meşrûta vakfı olup mahmiye-i İstanbul’da Altımermer kurbünde Arabacı Bâyezid mahallesinde vâki‘ iki tarafdan Karabaş Mustafa Efendi veresesi mülkleri ve bir tarafdan Kocamustafapaşa Câmi‘-i şerîfinde vâki‘ maslağa gallesi meşrûta vakf menzil ve bir tarafdan tarîk-i hâs ile mahdûd menzilin tevcîh-i hâkimü’ş-şer‘le mutasarrıfı olan eş-Şeyh Hasan Efendi b. Veliyüddin kendi rızâsıyla menzil-i mezbûrdan kasr-ı yed etmekle süknâ-yı menzil-i merkūm mahlûl işbu râfi‘u’l-kitâb Osman Efendi b. İsmail ulemâdan olup süknâya muhtâc ve her vechile muhîl ve müstahık olduğu sigāt-ı makbûletü’l-kelimât ihbâr etmeleriyle işbu kitâb-ı müşgîn-nikāb tevkī‘-i refî‘-i müstetâbı ile şeref-yâb olan hâkim-i câsim-i ma‘delet-nisâb tûbâ lehû ve hüsnü-meâb hazretleri dahi süknâ-yı menzil-i mahdûd-ı mezbûru ber-mûceb-i şart-ı vâkıfa kıbel-i şer‘den mezkûr Osman Efendi’ye tevcîh buyurup tasarrufum için işbu vesîka bi’t-taleb ketb olundu. Fî 28 min-Zilhicce sene [1]107 Şuhûdü’l-hâl: Ahmed Efendi b. Halil el-imâm, Mehmed Çelebi b. Mustafa el-müezzin, Mehmed Çelebi b. İbrahim, Ahmed Çelebi b. Mehmed, Hasan Çelebi b. Mustafa, Mahmud Efendi b. İbrahim, Mehmed Çelebi b. Halil, Mehmed Çelebi b. Hasan.