İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 529 Hüküm no: 408 Orijinal metin no: [131a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Abdullah menzil hissesini Mehmed Çelebi’ye sattığı Husûs-ı âti’l-beyânın mahâllinde ketb ve tahrîri iltimâs olunmağın savb-ı şer‘den bi’l-iltimâs Keşfî Abdullah Efendi b. Ali irsâl olunup ol dahi mahmiye-i İstanbul’da Silivrikapısı kurbünde Veledi Karabaş mahallesinde vâki‘ zikri âtî mülk menzile varıp zeyl-i kitâbda muharrerü’l-esâmî Müslimîn olan udûl-i Müslimîn ve sikāt-ı muvahhidîn mahzarlarında akd-i meclis-i şer‘-i şerîf eyledikde mahalle-i mezbûrede sâkine ve zâtı mahalle-i mezbûre imâmı Mehmed Efendi b. Elhâc Osman ve ahâlîsinden İbrahim Çelebi b. Ramazan nâm kimesne ta‘rîfleriyle mu‘arrefe olan Ümmühani bt. Handan nâm hatun meclis-i ma‘kūd-ı mezkûrda bâ‘isü hâze’l-kitâb Hasan b. Abdullah nâm kimesne tarafından husûs-ı âti’l-beyâna vekîli olduğu Abdurrahman Efendi b. Hanefi ve Elhâc Osman b. Ömer nâm kimesne şehâdetleriyle şer‘an sâbit olan Hasan Çelebi b. Abdullah nâm kimesne mahzarında bi’t-tav‘i’s-sâf ikrâr-ı tâm ve takrîr-i kelâm edip, zikr-i âtî akdin sudûruna değin sekiz sehminden bir sehm-i şâyi‘i yedimde mülk ve hakkım olup işbu bir tarafdan Bostancı İbrahim Beşe mülkü ve bir tarafdan Medîne-i Münevvere fukarâsına meşrût vakf menzil ve iki tarafdan tarîk-i âm ile mahdûd hâriciyesi bir bâb fevkānî oda ve bir sofa ve ahur ve kenîf ve dâhiliyesi iki bâb fevkānî oda ve bir matbah ve bir sofa ve bir bâb tahtânî oda ve bir mahtab ve mâbeynde bir kebîr dehliz ve üzerinde cihânnümâ ta‘bîr olunur bir oda ve bi’r-i mâ ve kenîf ve zât-ı eşcâr-ı müsmire ve gayr-ı müsmire cüneyneyi ve iki sokak kapısını müştemil olup akd-i meclis-i şer‘-i şerîf olunan mülk menzilden ber-vech-i mübîn bir sehim hisse-i şâyi‘amı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık vekîl-i mezbûr Hasan Çelebi’ye tarafeynden îcâb ve kabûlü hâvî şurût-ı müfsideden ârî bey‘-ı bâtt-ı sahîh-i şer‘î ile otuzbeş kuruşa bey‘ u teslîm ol dahi ber-vech-i muharrer bi’l-vekâle müvekkil-i mezbûr Mehmed Çelebi için iştirâ ve kabûl ve tesellüm eyledikden sonra semeni olan meblağ-ı mezbûr otuzbeş kuruşu vekîl-i mezbûr Hasan Çelebi yedinden tamamen ahz u kabz eyledim ba‘de’l-yevm menzil-i mezbûrun vech-i meşrûh üzere sekiz sehimden bir sehm-i şâyi‘i müvekkil-i mezbûr Mehmed Çelebi’nin mülk-i müşterâsı ve hakk-ı sarfı olmuşdur vechen mine’l-vücûh benim için hak ve alâka kalmadı keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î husûs-ı mezkûru mevlânâ-yı mezbûr mahâllinde ketb ü tahrîr ba‘dehû ma‘an irsâl olunan Mustafa Efendi b. İsa ve İbrahim Çelebi b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Zilka‘deti’ş-şerîfe li-sene seb‘a ve mie ve elf. Şuhûdü’l-hâl: Mehmed Efendi b. Elhâc Osman, Mehmed Efendi b. Musa, Abdullah Çelebi b. Üveys el-müezzin, İbrahim Çelebi b. Ramazan, Mehmed Çelebi b. Sefer, Ali Beşe b. Abdullah, Mustafa b. İbrahim, İsmail Çelebi b. İbrahim, İbrahim b. Abdullah, Halil Çelebi b. İsmail, Ahmed Çelebi b. Hüseyin, İbrahim Çelebi b. Mehmed.