İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 530 Hüküm no: 409 Orijinal metin no: [131b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahin v. Ohan’ın zevcesi Enmur bt. Avak v. Parnos’la evlilik akdinin devam ettiği Fi’l-asl vilâyet-i Anadolu’da ( ) kasabasında sâkin olup hâlâ mahmiye-i İstanbul’da Mercan sûkında sâkin Şahin v. Ohan nâm Ermeni dîvân-ı kāimmakām-ı hazret-i sadrazamîde ma‘kūd meclis-i şer‘-i enverde işbu bâ‘isetü’l-kitâb Agor bt. Avak v. Parnos nâm bikr-i bâliğa mahzarında babası mezkûr Avak hazır iken üzerine da‘vâ ve takrîr-i kelâm edip, târih-i kitâbdan iki sene mukaddem merkūme Agor babası mezkûr Avak’ın izin ve ma‘rifetiyle kendi âyinim üzere nefsine lede’ş-şuhûd bana inkâh ve tezvîc edip ben dahi tezevvüc ve kabûl ve mu‘accel olmak üzre iki yaldız altunu babası merkūm Avak’a def‘ u teslîm edip hâlâ mezbûre Agor’a zevce-i menkûham iken benimle zevciyet mu‘âmelesinden ibâ edip nefsini âhara tezvîc murâd eder hâlâ suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda ityân-ı beyyineden izhâr-ı acz birle istihlâf etmeğin fi’l-hakīka târih-i kitâbdan iki sene mukaddem nefsini müdde‘î-i mezbûr Şahin’e inkâh ve tezvîc etmeyip ol vechile hâlâ müdde‘î-i mezbûrun zevce-i menkûhası olmadığına mezbûre Agor’a yemîn teklîf olundukda ol dahi ba‘de’s-suâl yemîn billâhi’llezî enzele İncîli alâ [İsa] etmeğin mûcebiyle müdde‘î-i mezbûr bilâ-beyyine bî-vech mu‘ârazadan men‘ olunup mâ vaka‘a bi’t-taleb ketb olundu. Fî 27 min-Zilhicce sene [1]107 Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, Zübde-i ashâbi’t-tastîr ve’r-rakām tezkire-i sânî Hâfız Efendi, fahrü’l-eşbâh ve’l-a‘yân Mehmed Ağa ser-çavuşân, Umdetü’l-akrân Mehmed Ağa Muhzır, Halil Efendi b. Mehmed, Elhâc Ali Beşe b. Mehmed, Elhâc Ebûbekir Beşe b. Sinan, Mustafa Efendi nâib-i recül, Hüseyin Beşe b. Mehmed.