İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 539 Hüküm no: 413 Orijinal metin no: [134a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub b. Ali’nin insanların geçişine zarar veren menzilinin direklerini kaldırdığı mi’l-keşşâf Husûs-ı âti’l-beyânın mahâllinde ketb ve tahrîri bâbında fermân-ı âlî vârid olmağın imtisâlen lehû savb-ı şer‘-i enverden keşif nâibimiz olan fahrü’l-müderrisîn-i ekrem Abdullah Efendi b. Ali irsâl olunup ol dahi Hâssa mi‘mârlarından Dede Mehmed Halîfe b. İshak ve Ali Halîfe b. Abdülmennan ile mahmiye-i İstanbul’da Alipaşa Câmi‘-i Şerifi kurbünde Emin Sinan mahallesi sâkinlerinden Yakub b. Ali nâm kimesnenin menziline varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâm olan bî-garaz Müslimîn mahzarlarında akd-i meclis-i şer‘-i mübîn eyledikde mezbûr Yakub meclis-i ma‘kūd-ı mezbûrda yine mahalle-i mezbûre sâkinlerinden işbu râfi‘u’l-kitâb Elhâc Ahmed b. Mustafa ve Ahmed Çelebi b. Mehmed ve Elhâc Veli b. Yusuf ve Ömer Efendi b. Halil ve İmâm Ali Efendi b. Yusuf ve sâirleri muvâcehelerinde ikrâr ve takrîr-i kelâm edip, mezbûrûn Elhâc Ahmed ve Ahmed Çelebi ve Elhâc Veli ve Ömer Efendi ve Ali Efendi ve sâirleri bana işbu menzilin fevkānîsinde vâki‘ bir oda ve bir sofasının işbu müşâhede olunduğu üzre tarîk-i âm üzerinde üç direkleri ve zikrolunan direklerin üzerinde köprüler binâsı olup ve mürûr u ubûrumuza zarar- bîni olmağla men‘ u def‘eyle deyü benden da‘vâ etmeleri ile ben dahi sâlifü’z-zikr üç aded direkleri kaldırıp mi‘mârân-ı mezbûrâna mesâhaları üzre zikrolunan odanın sâbıku’z-zikr tarîk-i âm üzerinde olan binâsında tûlen altı ve arzan bir zirâ‘ binâ kat‘ etmekle zarar-ı mezkûru men‘ u def‘a ta‘ahhüd eyledim dedikde gıbbe’t-tasdîkı’ş-şer‘î vâki‘-i hâli mevlânâ-yı mezbûr mahâllinde ketb ü tahrîr ve ma‘an ba‘s olunan Mehmed Çelebi b. İbrahim ve Yusuf b. Abdurrahim ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-Zilhicceti’ş-şerîfe sene [1]107 Şuhûdü’l-hâl: Musa Efendi b. İsa, es-Seyyid Ahmed Çelebi b. Mustafa, Hüseyin Efendi b. Veliyüddin, Mehmed Çelebi b. Mehmed, Hasan Ağa b. Hüseyin, Ahmed Ağa el-mübâşir, Mustafa Çelebi Leblebici. Beyaz beyaz beyaz