İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 542 Hüküm no: 416 Orijinal metin no: [135a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa zimmetindeki paraların Ali Ağa b. Oruç’un vefatıyla varislerine intikal ettirileceği Da‘vâ Mahmiye-i İstanbul’da Âbid Çelebi mahallesi sükkânından iken bundan akdem vefât eden Ali Ağa b. Oruç b. Ali’nin verâseti zevce-i menkûhası Emine Hatun bt. Mustafa b. Ahmed ile sulbî kebîr oğlu Ebûbekir ve sulbiye sagīre kızı Sâliha’ya münhasıra olduğu şer‘an zâhir ve müte‘ayyin olduktan sonra mezbûr Ebûbekir asâleten ve kendi tarafından asîl ve sagīre-i mezbûre Sâliha’nın vâlidesi tesviye-i umûruna kıbel-i şer‘den mansûbe vasîsi olan merkūme Emine Hatun tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iye ile ârifân Ahmed Çelebi b. Osman ve diğer Ahmed b. Osman şehâdetleriyle şer‘an sâbit olan İsmail Efendi b. Mahmud vekâleten meclis-i şer‘-i şerîf-i enverde attar tâifesinden Halil Ağa b. İbrahim nâm kimesne mahzarında her biri asâleten ve vekâleten üzerine da‘vâ ve takrîr-i kelâm edip, bin yüz iki senesi şehr-i Recebi’l-ferdinde müteveffâ-yı merkūm Ali Ağa hâl-i hayat ve kemâl-i sıhhatinde her yüz vukıyyesi seksenbeş kuruşa olmak üzere yedi ferde içinde mevcûd yedi yüz altmış yedi vukıyye kahvesine altı yüz elli iki kuruşa işbu mezbûr Halil Ağa’ya bey‘ u teslîm edip ol dahi ber-vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûrun iki yüz kuruşunu yedinden ahz u kabz edip mâ‘adâsı olan dört yüz elli iki kuruşu kable’l-ahz mezbûr Halil Ağa’nın zimmetinde iken mezbûr Ali Ağa fevt olmakla ırsen veresesi mezbûrûna isâbet etmeğin hâlâ suâl olunup alıverilmesi matlûbumdur dediklerinde gıbbe’s-suâl mezbûr Halil Ağa cevâbında müteveffâ-yı mezbûrdan târih-i mezbûrda [135b] ancak iki ferde kahvesini iki yüz yetmiş kuruşa iştirâ ve tesellüm ve semen-i mezbûrun iki yüz kuruşunu bi’z-zât mezbûr Ali Ağa’ya ve yetmiş kuruşunu bi’z-zât oğlu mezbûr Ebûbekir ile vekîli İvaz b. Abdullah yedleriyle edâ ve teslîm eyledim deyü yetmiş kuruşa def‘le mukābele ve ziyâdeyi bi’l-külliye inkâr edecek gıbbe’l-istintâk ve’l-inkâr evvelâ müdde‘iyân-ı mezbûrândan ziyâde müdde‘âlarına mutâbıka beyyine taleb olundukda udûl-i ahrâr-ı ricâl-i Müslimînden olup zikrolunan Âbid Çelebi mü’ezzini olan Abdullah Efendi b. Elhâc Veli ve Şeyh Rüstem mahallesi imâmı olan Süleyman Efendi b. Mehmed ve Âbidçelebi mahallesi sükkânından Ahmed Bey b. Osman nâm kimesneler li-ecli’ş-şehâde meclis-i şer‘a hâzırûn olup isrü’l-istişhâd fi’l-hakīka bin yüz iki senesi şehr-i Recebi’l-ferdinde müteveffâ-yı merkūm Ali Ağa b. Oruç b. Ali hâl-i hayatında her yüz vukıyyesi seksenbeş kuruşa olmak üzere yedi ferde içinde mevcûd yedi yüz altmış yedi vukıyye kahvesini altı yüz elli iki kuruşa işbu mezbûr Halil Ağa’ya bizim huzûrumuzda bey‘ u teslîm edip mezbûr Halil Ağa dahi iştirâ ve kabûl ve tesellüm ve kabz etmiş idi biz bu husûsa bu vech üzre şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinden şuhûd-ı mezbûrûn mahalleleri ahâlîlerinden sırren ve alenen ta‘dîl ve tezkiye olundukda şehâdetleri makbûle olmağın, sâniyen mezbûr Halil Ağa’dan def‘-i mezbûrunu mübeyyene beyine taleb olundukda ityân-ı beyyineden izhâr-ı acz edip tahlîfe dahi tâlib olmamağın mûcebiyle meblağ-ı bâkī-i mezbûr dört yüz elli iki kuruşu verese-i mezbûrûna edâ ve teslîme merkūm Halil Ağa’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi 3 min-Muharremi’l-harâm sene [1]108 Şuhûdü’l-hâl: Elhâc Mehmed Çelebi b. İbrahim, Ali Beşe b. Mehmed, Receb b. Osman, İbrahim Çelebi b. Ahmed, Receb b. Osman.