İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 549 Hüküm no: 422 Orijinal metin no: [137b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Mehmed’in Mustafa Efendi b. Hüseyin Ağa varisleriyle davasında tenakuz olduğundan reddedildiği Da‘vâsı tenâkuz olmağın bî-vech mu‘ârazadan men‘ Mahmiye-i İstanbul’da medîne-i Trabzon’da Eksotha mahallesi ahâlîsinden olup mahmiye-i İstanbul’da bi-tarîkı’l-müsâfere sâkin olan Hasan Ağa b. Mehmed nâm kimesne dîvân-ı kāimmakām-ı hazret-i Sadrazamîde ma‘kūd meclis-i şer‘-i şerîf-i enverde merhûm Vezîr-i a‘zam Karamustafa Paşa’nın mukaddemâ mektûbcusu ve hîn-i fevtinde reisülküttâb olup bundan akdem medîne-i Edirne’de mağzûben fevt olan Mustafa Efendi b. Hüseyin Ağa b. Mehmed’in verâseti sulbî sagīr oğlu Abdullah Çelebi’ye münhasıra olup ba‘dehû sagīr-i mezbûr Abdullah Çelebi dahi fevt olup verâseti vâlidesi Emetullah Hatun bt. Abdullah b. Abdurrahman’a münhasıra olduğu şer‘an zâhir ve müte‘ayyin oldukdan sonra mezbûre Emetullah Hatun tarafından husûs-ı âti’z-zikre vekîl-i müsecceli olan zevci Mustafa Ağa b. Mehmed mahzarında üzerine da‘vâ ve takrîr-i kelâm edip, medîne-i mezbûrede vâki‘ İmâret-i Hatuniye evkāfının tevliyeti üç sene ber-tahvîl ile üzerime tevcîh etdirip ve berat vesâir kapı harcına sarf ve zikrolunan üç senenin harc ve muhâsebe vermek için emâneten ben kendi malımdan mezbûr Reis Mustafa Efendi’ye hayatında bin seksen yedi senesinde bin beş yüz kuruş ve bin seksen sekiz senesinde üçbin kuruş ki cem‘an dört bin beş yüz kuruş def‘ u teslîm ol dahi ahz u kabz ve kendi mesârifine sarfla istihlâk eyledikden sonra mezbûr Mustafa Efendi zikrolunan mesârif-i mezbûreye bir habbe vermeyip ben tekrar kendi malımdan edâ etmeğin meblağ-ı mezbûrdan bin beş yüz kuruşu mezbûr Mustafa Efendi zimmetinde bâkī kalıp kable’l-edâ evvelâ kendi ba‘dehû oğlu merkūm Abdullah Çelebi fevt olmağın, hâlâ suâl olunup meblağ-ı mezbûr tereke-i müteveffâ-yı mezbûrdan bana edâya vekîl mezbûr Mustafa Ağa’ya tenbîh olunmak matlûbumdur dedikde gıbbe’s-suâl vekîl-i mezbûr Mustafa Ağa cevâbında husûs-ı mezbûru bi’l-külliye inkâr eylediğinden mâ‘adâ müdde‘î-i mezbûr Hasan Ağa târih-i kitâbdan beş gün mukaddem huzûr-ı hâkimü’ş-şer‘de zikrolunan berat ve kapı harcı ve harc-ı muhâsebeye müte‘allika bir nesne iddi‘â etmeyip hâlâ müdde‘âsı olan meblağ-ı mezbûrdan bin beş yüz kuruşa merhûm-ı mezbûra mutlak rüşvet olmak üzre def‘ u teslîm etmişidim deyü iddi‘â edip ol vechile müdde‘î-i mezbûrun da‘vâsı münâkız olduğundan gayri müdde‘î-i mezbûr Hasan Ağa sagīr-i mezbûr Abdullah Çelebi’nin hayatında vasîsi olan Ahmed Ağa ile Gümüşhâne’ye giderken menzilinden altı ay meks edip ve ekser-i eyyâmda mahmiye-i mezbûreye gelip merhûm-ı mezbûr Mustafa Efendi ile hayatında ve ba‘dehû vasî-i mezbûr ile ve müvekkil-i merkūme Emetullah Hatun ile her bâr mülâkī olup huzûr-ı mezbûra müte‘allika asla bir nesne da‘vâ etmeyip yirmi seneden beri bilâ-özr-i şer‘î sükût etmişdir deyücek gıbbe’l-istintâk müdde‘î-i merkūm Hasan Ağa cevâbında fi’l-hakīka târih-i kitâbdan beş gün mukaddem huzûr-ı hâkimü’ş-şer‘de hâlâ müdde‘âsı olan meblağ-ı mezbûr dört bin beş yüz kuruşa merhûm-ı mezbûra mutlak rüşvet olmak üzre def‘ u teslîm etmişidim deyü iddi‘â eylediğine ve ber-vech-i muharrer vasî-i mezbûr Ahmed Ağa ile Gümüşhâne’ye giderken menzilinde altı ay meks edip ve ekser-i eyyâmda mahmiye-i [138a] mezbûreye gelip merhûm-ı mezbûr Mustafa Efendi ile hayatında ba‘de’l-vefât vasî-i mezbûr ile ve müvekkile-i merkūme Emetullah Hatun ile her bâr mülâkī olup husûs-ı mezbûra müte‘allik asla bir nesne da‘vâ etmeyip yirmi seneden beri bilâ-özr-i şer‘î sükût eylediğine tâyi‘an ikrâr ve i‘tirâf etmeğin mûcebiyle on beş sene bilâ-özr-i şer‘î terk olunan da‘vânın bilâ-emr-i şerîf istimâ‘ı memnû‘ olduğundan mâ‘adâ müdde‘î-i mezbûr Hasan Ağa meblağ-ı mezbûru merhûm-ı mezbûra gâh rüşvet olmak üzre def‘ ve teslîm eyledim ve gâh berat ve kapı harcına sarf ve harc-ı muhâsebeye vermek üzre emâneten vermişidim deyü iddi‘â etmekle da‘vâsı tenâkuz olup müdde‘î-i mezbûr Hasan Ağa ber-vech-i muharrer bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fî 6 min-Zilhicce sene [1]107 Şuhûdü’l-hâl: Tezkire-i Evvel Yusuf Efendi, Tezkire-i Sânî Hâfız Efendi, Mehmed Ağa Ser-çavuşân, Muhzır Mehmed Ağa, Mustafa Efendi nâib-i recül, Receb Efendi nâib-i kapan, Elhâc Halil Efendi b. Mehmed, Hüseyin Efendi b. Mehmed.