İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 557 Hüküm no: 427 Orijinal metin no: [140a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Beşe’nin terekesinin, Filibe kadılığından gelen yazıda belirtilen şahıslara kaldığı Nakl Hâlâ medîne-i Filibe kadısı olan umdetü’l-mevâli’l-izâm Mehmed Efendi b. İbrahim b. Derviş imzâsıyla mümzâ ve hâtemiyle mahtûm ve bin yüz yedi senesi Zilhicceti’ş-şerîfesi’nin yirmi ikinci günü târihi ile müverraha nakl-i şer‘î vârid olup mazmûnu medîne-i Filibe kazâsına tâbi‘ Estona nâm karye ahâlîsinden nâkılü’l-kitâb Hasan b. Musa b. Osman nâm kimesnede ber-vech-i âtî da‘vâ-yı sahîha-i şer‘iye ile mesbûk istişhâd-ı şer‘î sudûrundan sonra udûl-i Müslimîn’den ve karye-i mezbûre ahâlîsinden Yahya b. Mehmed b. Malkoç ve Yusuf b. Durali b. Veli nâm kimesneler nakl ve tahvîl için mahâll-i cerh ve ta‘dîle hâzırân her biri şöyle edâ-i şehâdet-i şer‘iye eylediler ki, fi’l-asl karye-i mezbûre ahâlîsinden Dergâh-ı âlî yeniçerilerinin birinci sekbânlarına mahsûs oda ahâlîsinin odabaşıları olup mahmiye-i İstanbul’da Kâtib Muslihiddin mahallesinde sâkin iken fevt olmağla terekesi emîn-i beytü’l-mâl yedinde mazbût idiği mesmû‘umuz olan Mehmed Beşe ile müsteşhed-i mezbûr Hasan’ın babası merkūm Musa li-ebeveyn karındaşlar olup babaları ismi Osman ve vâlideleri ismi Nefise Hatun bt. Osman ve cedleri ismi Ali ve maskat-ı re’sleri mârrü’z-zikr Estona karyesidir, müteveffâ-yı mezbûr Mehmed Beşe’nin verâseti min-ciheti’l-asûbeti’n-nesebiye ancak müsteşhed-i mezbûr Hasan ile zevce-i menkûhası Şerife Âişe Hatun’a münhasıradır, gayrı vârisi ve terekesine müstahıkk-ı âhar olduğu ma‘lûmumuz değildir, hâlâ müteveffâ-yı mezbûrun terekesi selâse-i erba‘ını müsteşhed-i mezbûr Hasan için emîn-i mezbûrdan vesâir vâzı‘u’l-yed olanlardan hak taleb ve ahz vardır, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olduğunu hâvî bulunmağın nakl-i mezbûr müteveffâ-yı mezbûrun vâlidesi mezbûre Nefise Hatun’un li-ebeveyn karındaşı Kaya nâm kimesnenin oğlu olup zî-rahm cihetinden vârisi olmağla ancak emîn-i beytü’l-mâlden mukaddem olan Hüseyin Beşe nâm kimesne müsteşhed-i mezbûr karye-i merkūmede bulunmağla kendi vâris ve tereke-i müteveffâ-yı mezbûrun selâse-i erbâ‘ına müstahık olmak üzere müteveffâ-yı mezbûrdan emîn-i beytü’l-mâlin makbûzunu ahz u kabz etmekle tereke-i müteveffâ-yı mezbûra vâzı‘ul-yed olan mezbûr Hüseyin Beşe muvâcehesinde feth ü kırâet ve istintâk olundukda ber-vech-i muharrer tereke-i müteveffâ-yı mezbûrdan emîn-i beytü’l-mâlin makbûzunu ahz u kabz etmekle tereke-i müteveffâ-yı mezbûra vâzı‘u’l-yed olduğunu ikrâr lâkin nakl-i mezbûrun mevlânâ-yı mûmâ-ileyh kıbelinden vürûdunu inkâr edicek mezbûr Hasan’dan nakl-i mezbûrun mevlânâ-yı mezbûr kıbelinden vürûdunu mübeyyene beyyine taleb olundukda udûl-i Müslimîn’den ve zeyl-i nakl-i mezbûrda isimleri mastûr olan şuhûd tarîkden olup karye-i mezbûre ahâlîsinden İmâm Mustafa Efendi b. Mehmed ve zikrolunan birinci sekbânlarına mahsûs oda ahâlîsinden Mehmed Beşe b. Mustafa nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-hakīka işbu nakl-i mezbûr hâlâ medîne-i Filibe kadısı olan mûmâ-ileyh Mehmed Efendi b. İbrahim b. Durmuş kıbelinden vârid olup nakl-i mezbûru mevlânâ-yı mûmâ-ileyh Mehmed Efendi bizim huzûrumuzda ba‘de’l-kırâet imzâ edip ve mühürleyip hat ve hâtemine bizi işhâd eyledi, hâlâ nakl-i mezbûrun zeylinde olan hat ve zahrında olan hâtem mûmâ-ileyh Mehmed Efendi b. İbrahim b. Durmuş’un hat ve hâtemidir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ hüve’l-vâki‘ bi’t-taleb ketb olundu. Fi’l-yevmi’l-âşir min-Muharremi’l-harâm li-sene semân ve mie ve elf min-hicreti men lehu’l-izzü ve’ş-şeref. Şuhûdü’l-hâl: Mustafa Efendi b. Mehmed, Salih Efendi b. Mustafa, Mehmed Çelebi b. Ahmed, Mehmed Efendi b. Mustafa, Ahmed Efendi b. el-Hâc Esad, Mustafa Çelebi b. ( ), Mehmed Çelebi b. İbrahim, Receb b. Osman, el-Hâc Halil Efendi.