İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 560 Hüküm no: 429 Orijinal metin no: [140b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Ebülvefa Vakfı’na ait yanmış olan imaretin tamiri için mütevelli Mehmed Ağa b. Mustafa’nın elli sekiz bin akçe harcadığı. Dârü’l-hilâfeti’l-aliyye-i Kostantıniyyeti’l-mahmiyede vâki‘ eş-Şeyh Ebulvefa Evkāfı’na bi’l-fi‘il mütevellî olan işbu râfi‘u’l-kitâb fahrü’l-akrân el-Hâc Mehmed Ağa b. Mustafa nâm kimesne meclis-i şer‘-i şerîf-i enverde bi’t-tevliye takrîr-i kelâm ve ta‘bîr ani’l-merâm edip vâkıf-ı müşârun-ileyh hazretlerinin câmi‘-i şerîfi kurbünde vâki‘ ma‘lûmü’l-hudûd bir bâb imâreti bundan akdem vâki‘ olan harîkde muhterık olmağla mukaddemâ izn-i şer‘le duvarları ta‘mîr olundukdan sonra hâlâ imâret-i mezkûrenin matbah ve buğday ve pirinç anbârları müceddeden binâ olunup ve su mahzeni ve sâir mevâzi‘i ta‘mîr olunmağla kıbel-i şer‘den üzerine varılıp masrûfum tahmîn-i sahîh ile tahmîn ve takvîm olunmak matlûbumdur dedikde savb-ı şer‘den Mevlânâ Abdurrahman Efendi b. Mehmed irsâl olunup ol dahi hâssa mi‘mârlardan es-Seyyid Mustafa Çelebi b. Eyüb ve Ali Halîfe b. Abdullah ve zeyl-i vesîkada muharrerü’l-esâmî Müslimîn ile imâret-i mezkûrenin üzerine varıp mi‘mârân-ı mezkûrân mütevellî-i mezkûr ve Müslimîn-i mezkûrîn muvâcehelerinde keşf ve mesâha eylediklerinde imâret-i mezbûrede vâki‘ matbah ve anbâr üzerlerinde olan mertekleri çifte çubuk dirke tabanı ve battal-ı Rum ile mahlût pedavra Keşan tahtasıyla döşenmiş tûlen ve arzen be-hesâb-ı terbî‘î iki yüz seksen dokuz zirâ‘ sakfın zirâ‘ı sekiz akçeden yirmi üç bin üç yüz yirmi akçe ve kirişleme [141a] için bir verona sütunu dört yüz akçe ve imâret-i mezkûrenin tûlen ve arzen ve kadden be-hesâb-ı mezkûr seksen dört zirâ‘ ocak temeli ve ızgarasının zirâ‘ı kırkar akçeden üç bin üç yüz altmış akçe ve ocak-ı mezkûrun etrâfında vâki‘ tûlen ve kadden be-hesâb-ı mezkûr kırk bir zirâ‘ kârgir taş duvarın zirâ‘ı altmış akçeden iki bin dört yüz doksan akçe ve ocak-ı mezkûrun altı zirâ‘ı kârgir kemerinin zirâ‘ı yüz yirmişer akçeden yedi yüz yirmi akçe ve tûlen ve kadden be-hesâb-ı mezkûr on dört zirâ‘ tepesi kârgir ve tuğla ve kaygan ile mahlût ocağın zirâ‘ı yüz altmış akçeden iki bin yüz kırk akçe ve yanında bir sandık dolap üç yüz akçe ve be-hesâb-ı mezbûr kireç ile sıvalı ve badanalı yüz otuz zirâ‘ dolma duvarın zirâ‘ı elli ikişer akçeden altı bin yedi yüz altmış akçe ve ağaç parmaklı çerçeve ve kanadlarıyla beş pencere ikişer yüz akçeden bin akçe ve duvarda yarımı billûr camlı on pencere yüz ellişer akçeden bin beş yüz akçe ve ağa tahtasından bir kapı yüz elli akçe ve mahâll-i mezkûrda sekiz zirâ‘ tahta perdenin ve zirâ‘ı otuz bir akçeden iki yüz kırk akçe ve on bir zirâ‘ ve oturak tahtası yirmişer akçeden iki yüz yirmi akçe ve ocak taşı ta‘mîrine kırk akçe ve tûlen ve kadden be-hesâb-ı mezkûr yirmi dört zirâ‘ müceddeden ağa tahtasından mebnî buğday ve pirinç anbârının zirâ‘ı otuzar akçeden yedi yüz yirimi akçe ve be-hesâb-ı merkūm kırk dört zirâ‘ ağa tahtasından döşemenin dirke tabanı değişilmesiyle ma‘an zirâ‘ı kırkar akçeden bin yedi yüz altmış akçe ve ağa tahtasından on sekiz zirâ‘ bölmenin zirâ‘ı yirmişer akçeden dört yüz elli akçe ve Rumeli ve derke ile mahlût yirmi altı zirâ‘ parmaklık zirâ‘ı yirmi dörder akçeden altı yüz yirmi dört akçe ve ağa tahtasından bir kapı ma‘a çerçeve ber-vech-i tahmîn yüz elli akçe ve verâ-i matbahda vâki‘ sagīr odanın çam tahtasından nîm şişeli terbî‘î otuz zirâ‘ beyâz tavanın zirâ‘ı kırkar akçeden bin iki yüz akçe ve oda altında ve taşrasında ve su mahzeni tarafında taşları eski be-hesâb-ı terbî‘i kırk yedi zirâ‘ taş duvarın zirâ‘ı kırkar akçeden bin sekiz yüz seksen akçe ve duvar-ı mezkûrun be-hesâb-ı mezkûr yirmi yedi zirâ‘ kiremidli sakfının zirâ‘ı yirmi beş akçeden altı yüz yetmiş beş akçe ve pencere kanadı elli akçe ve matbah-ı mezkûrun elli zirâ‘ tuğla ve kireç ile kerpi[ç]in zirâ‘ı otuz akçeden bin beş yüz akçe ve su mahzeni üzerinde on zirâ‘ müceddeden sundurmanın zirâ‘ı otuzar akçeden üç yüz akçe ve üç zirâ‘ tahta kaplamanın zirâ‘ı yirmi beş akçeden yetmiş beş akçe ve be-hesâb-ı terbî‘î on bir zirâ‘ kârgir su mahzeninin zirâ‘ı altmış akçeden altı yüz altmış akçe ve su mahzeninin müceddeden otuz sekiz zirâ‘ gön? ve sıvanın zirâ‘ı kırkar akçeden bin beş yüz yirmi akçe ve taş mıcır elli dört zirâ‘ kaldırımın zirâ‘ı üçer akçeden yüz altmış iki akçe ve müceddeden yedi zirâ‘ kenîf sakfının zirâ‘ı otuzar akçeden iki yüz on akçe ve etrâfı tahta kaplama on sekiz zirâ‘ meşe tahtası döşemenin zirâ‘ı otuzar akçeden beş yüz kırk akçe ve dört üzerine olan iki kurşun borunun dânesi ikişer yüz kırkar akçeden iki bin sekiz yüz seksen 2.880 akçe ki işbu vech-i meşrûh üzere olan binâ ve ta‘mîr min-haysü’l-mecmû‘ elli sekiz bin akçe ile ancak olur deyü mi‘mârân-ı mezkûrân ve Müslimîn-i mezbûrîn icmâ‘ ve ittifâk eylediklerinde vâki‘ hâli mevlânâ-yı mezbûr mahâllinde tahrîr ma‘an ba‘s olunan Hacı Salih b. Receb ve Mustafa b. Hasan ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fî 6 min-Muharrem li-sene [1]108. Şuhûdü’l-hâl: Fahrü’l-akrân el-Hâc Mahmud, Abdurrahman Efendi b. Ahmed, Mustafa Efendi b. Ömer, Ahmed Efendi b. Mirza, Mustafa Efendi b. Ahmed, Ömer Efendi b. Abdullah, el-Hâc Mustafa b. Bektaş, el-Hâc Ömer Ağa b. Osman, Mehmed Çelebi b. Rasûl, Ali Çelebi b. ( ), İbrahim b. Hasan el-Bevvâb, Mehmed Çelebi b. Mustafa, İbrahim b. Mehmed.