İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 567 Hüküm no: 431 Orijinal metin no: [143a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Behram’ın vakfettiği eve ait tasarruf hakkının, Ebubekir b. Mehmed’e ait olduğu Fi’l-asl vilâyet-i Anadolu’da Hamid sancağında Gölhisar kazâsına tâbi‘ Beyköy nâm karye ahâlîsinden olup mahmiye-i İstanbul’da Ahırkapı kurbünde Kabasakal Sinan Ağa mahallesinde vâki‘ el-Hâc Mehmed b. Behram nâm sahibü’l-hayrın evlâd-ı evlâdından ve zikri âtî menzilin meşrûtun-lehi olduğunu iddi‘â eden işbu râfi‘u’l-kitâb Ebûbekir b. Mehmed b. Ebibekir nâm kimesneye meclis-i şer‘-i şerîf-i enverde mahalle-i mezbûrede hâlâ imâm olup zikri âtî menzile tevliyet ve tasarrufu kendinin olmak üzere vaz‘-ı yedi sâbit ve zâhir olan İmâm Ahmed Efendi b. Mehmed mahzarında üzerine da‘vâ ve takrîr-i kelâm edip Hüseyin Ağa mahallesinde vâki‘ bir tarafı Celeb Mehmed Ağa menzili ve bir tarafı tarîk-i hâs ve iki tarafı tarîk-i âm ile mahdûd fevkānî üç bâb oda ve tahtânî iki bâb oda ve bi’r-i mâ ve ahır ve havluyu müştemil menzil bin altı senesi Recebi’l-ferdi evâhirinde İstanbul kadısı olan merhûm ve mağfûrun-leh Ebussuûdzâde Mustafa Efendi’nin imzâsıyla mumzât ve hatmiyle mahtûm ve târih-i mezkûr ile müverraha işbu vakfiye-i ma‘mûlün-bihâ nâtıka olduğu üzere vâkıf-ı mezbûr el-Hâc Mehmed b. Behram’ın tasarrufu kendiden sonra evlâdına ve evlâd-ı evlâdına ve evlâd-ı evlâd-ı evlâdına batnen ba‘de batnin ile’l-inkırâz ve ba‘de’l-inkırâz mahalle-i mezbûre imâm ve müezzinine meşrûta vakfı olup ve ben vâkıf-ı mezbûr el-Hâc Mehmed’in sulbî oğlu Şaban’ın sulbiye kızı Fatıma’nın sadriye kızı Râziye bt. Yusuf’un sadrî oğlu olup menzil-i mevkūf-ı mezbûrun tasarrufu ber-mûceb-i şart-ı vâkıf hakk-ı meşrûtum olup ben karye-i mezbûrede iken derecede benden mukaddem olan ceddem mezbûre Fatıma’nın âhar kızı Emine nâm hatun mutasarrıfe olup ba‘de’l-vefât mezbûre Emine’nin kızı Râbia nâm hatun ba‘de’l-vefât mezbûre Râbia’nın oğlu Ömer mutasarrıflar olup hâlâ mezbûr Ömer fevt olmağla nevbet-i tasarruf benim iken imâm-ı mezbûr vâkıf-ı mezbûrun evlâdı münkarizler olup nevbet-i tasarruf kendinin olmak üzere menzil-i mezbûra vâzı‘u’l-yed olmağın suâl olunup menzil-i mezbûrdan kasr-ı yed ve bana teslîme mezbûr İmâm Ahmed Efendi’ye tenbîh olunmak matlûbumdur deyü mûmâ-ileyh Ebussuûdzâde Mustafa Efendi’nin imzâsıyla mumzât ve hatmiyle mahtûme ve târih-i mezkûr ile müverraha ve mazmûnu min-külli’l-vücûh takrîr-i meşrûhuna muvâfık bir kıt‘a vakfiye ibrâz etmeğin gıbbe’s-suâl imâm-ı mezbûr Ahmed Efendi cevâbında mazmûn-ı vakfiye-i mezbûreyi ve vâkıf-ı mezbûrun evlâd-ı evlâdı münkarizler olup nevbet-i tasarruf kendinin olmak üzere menzil-i mezbûra ber-vech-i mübeyyen vâzı‘u’l-yed olduğunu ikrâr lâkin müdde‘î-i mezbûrun ber-vech-i mufassal vâkıf-ı mezbûrun evlâd-ı evlâdından olduğunu inkâr edicek müdde‘î-i mezbûrdan müdde‘âsını mübeyyene beyyine taleb olundukda udûl-i Müslimîn’den fi’l-asl karye-i mezbûre ahâlîsinden olup hâlâ mahmiye-i mezbûrede Üskübî mahallesinde sâkinler olan Sefer Bey b. Mahmud ve Harâccı Ömer b. Ahmed ve el-Hâc Mustafa b. el-Hâc Mahmud nâm kimesneler li-ecli’ş-şehâde meclis-i şer‘e hâzırûn olup istişhâd olunduklarında fi’l-hakīka işbu müdde‘î-i mezbûr Ebûbekir vâkıf-ı mezkûr el-Hâc Mehmed b. Behram’ın sulbî oğlu Şaban’ın sulbî kızı Fatıma’nın sadriye kızı Râziye bt. Yusuf’un sadrî oğludur, menzil-i mevkūf-ı mezbûrun nevbet-i tasarrufu hâlâ müdde‘î-i mezbûr Ebûbekir’in ber-mûceb-i şart-ı vâkıf hakk-ı meşrûtudur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olup mûcebiyle ba‘de’l-hükm menzil-i mezbûrdan kasr-ı yed ve müdde‘î-i mezbûra teslîme imâm-ı mezbûra ba‘de’t-tenbîh mâ vaka‘a bi’t-taleb ketb olundu. Fi’l-yevm 12 min-Muharremi’l-harâm sene [1]108. Şuhûdü’l-hâl: İbrahim Efendi b. Süleyman, İbrahim Efendi b. Oruc, Abdülkerim b. Ömer, Yusuf Çelebi b. Ahmed, Ali Çelebi b. Süleyman, el-Hâc Halil Efendi b. Mehmed.