İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 568 Hüküm no: 432 Orijinal metin no: [143b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu ve ekmekçilerin unkapanına gemi ile gelen buğdayları paylaşma konusunda anlaştıkları Mahmiye-i İstanbul’da Uncular kethudâsı olan Mehmed Ağa b. Mehmed ve Mehmed Çelebi b. Hüseyin ve Mehmed b. Ebîbekir ve sâbıkā kethudâ olan el-Hâc Mehmed b. Ahmed ve el-Hâc Osman b. Mehmed ve es-Seyyid Burhaneddin Çelebi b. Ahmed ve es-Seyyid Kasım Çelebi b. Mehmed ve Ahmed b. el-Hâc Ömer ve el-Hâc Salih b. Mehmed ve Hüseyin b. Salih ve Mustafa b. Ali ve Fazlı b. Mustafa ve Ahmed b. Yusuf ve Mustafa b. Hüseyin ve Ali b. Hüseyin ve Yusuf b. Ahmed ve Ali ve Hasan b. Abdullah ve İbrahim b. Yahya ve Zekeriya b. Mehmed ve Ahmed b. Mustafa ve diğer Zekeriya b. Mustafa ve el-Hâc İbrahim b. Zeynelabidin ve Ahmed b. Mehmed nâm kimesneler ile yine tâife-i mezbûreden İstati v. Dimo ve Panayot v. Dimo ve Petro v. Andriya ve Kanalo v. İstati ve Yani v. Kiryazi ve Yani v. Kosta ve Yorgo v. Kiryazi ve Panayot v. Kanalo ve Keryazi v. Yorgo ve Kanalo v. Kesbayi nâm zimmîler ve sâirleri meclis-i şer‘-i şerîfde mahmiye-i mezbûrede habbâz tâifesinin kethudâları olan Süleyman Ağa b. Mehmed ve yiğitbaşıları olan Ali b. Mehmed ve Salih b. Mustafa b. Eyüb ve [habbâz] tâifesinden Nazar v. Karaman ve Nikfos v. Makos ve Kiragos v. Haçuk ve Kigo v. Kiro ve Andriyas v. Hokaz ve Aritun v. Filyos ve Elpek v. Bavram ve Sehrab v. Mardıros ve Kalos v. Kalok ve Farhad v. Marat ve Asator v. Zarak ve Moses v. Agop ve Maksur v. Agop ve Serbet v. Bedros ve Haçuk v. Çoban ve Arakil v. Avanos ve Avayos v. Kiragos ve sâirleri muvâcehelerinde her biri takrîr-i kelâm edip biz kadîmü’l-eyyâmdan ilâ hâze’l-ân ekmekçi tâifesinin yamağı olup beher sene ihrâcı fermân olunan ordu-yı hümâyûn bedelini ve sâir tekâlîfi mezbûrlara verip onlar dahi kabzına memûr olanlara edâ edip bu makābelede kapan-ı dakīke buğday sefîneleri geldikde her on sefînede bir sefîne buğday ve sâir sefâyinin baş ve kıç altlarında olan buğdayı bizim sarfımız olan semt uncuları iştirâ ve kendi beynimizde iktisâm ve değirmenlerimizde dakīk edip dükkânlarımızda ve pazarlarımızda ağniyâ vü fukarâ vü zu‘afâ ve âmme-i ibâdullâha bey‘ edegelip ve mâ‘adâ dokuz sefîne buğdayı orta anbârlarının buğdaylarını habbâz tâifesi iştirâ edegelmiş iken tâife-i mezbûre size mahsûs ve mu‘ayyen sefîne verdirmeyiz deyü bizi buğday iştirâsından men‘ etmeleriyle değirmen ve dükkânları mu‘attal olup ibâdullâhın zahîresi olan dakīkin kılletine bâ‘is ve beynimizde ihtilâle bâdî olmuşdur, hâlâ kadîmde olageldiği vech üzere kapan-ı mezbûra gelen buğday sefînelerinin her on sefînede bir sefîne buğdayı ve sâir sefâyinin baş ve kıç altlarında olan buğdayı ibâdullâha zahîreden un dakīk etmek için ve mâ‘adâ dokuz sefîne ve orta anbârlarının buğdayını habbâz tâifesi iştirâ edip ba‘de’l-yevm her birimiz âhara mu‘ayyen ve mahsûs olan buğdaya dahl ü ta‘arruz etmemek üzere kavl ü ittifâk ve ahd ü mîsâk eyledik suâl olunup takrîrleri tahrîr olunmak matlûbumuzdur dediklerinde gıbbe’s-suâl mezbûrûn habbâz tâifesi cevâblarında fi’l-hakīka kazıyye bâlâda tafsîl olduğu vech üzere olup her birimiz âhara mu‘ayyen ve mahsûs olan buğdaya dahl ü ta‘arruz etmemek üzere beynimizde kavl ü ittifâk ve ahd ü mîsâk eyledik deyü mezkûr uncu tâifesi cemî‘-i kelimât-ı meşrûhalarında vicâhen ve şifâhen tasdîk ve tahkīk etmekle mâ vaka‘a hıfzan li’l-makāl bi’t-taleb ketb olundu. Fî gurrei Zilhicceti’ş-şerîfe sene [1]108. Şuhûdü’l-hâl: Mustafa Çelebi b. Mehmed Yiğitbaşı, el-Hâc Osman b. Mehmed Pazarbaşı, el-Hâc Süleyman b. Mehmed Yiğitbaşı, Receb Efendi b. Mehmed Nâib-i kapan, Mustafa Efendi Nâib-i recül, Hüseyin Çelebi b. () Terâzibaşı, Ramazan Çelebi Terâzibaşı, el-Hâc Ali Çukadar.