İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 569 Hüküm no: 433 Orijinal metin no: [143b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Abdülbaki Çelebi’nin vakfettiği evin, eve ihtiyacı olan Hasan Efendi b. Hüseyin’e verildiği Merhûm Abdülbaki Çelebi nâm sahibü’l-hayrın süknâsı fukarâdan bir recül-i sâlihe meşrûta vakfı olup mahmiye-i İstanbul’da Mimar Sinan mahallesinde vâki‘ bir tarafdan tarîk-i âm ve bir tarafdan tarîk-i hâs ve bir tarafdan Medîne-i münevvere Evkāfı’ndan olan menzil ve bir tarafdan gallesi mahalle-i mezbûre çeşmesine mevkūf menzil ile mahdûd ve bir bâb tahtânî oda ve zât-ı eşcâr cüneyneyi müştemil menzilin ber-mûceb-i şart-ı vâkıf mutasarrıfı olan Mehmed b. Abdullah nâm kimesne süknâ-yı menzil-i mezbûrdan kasr-ı yed eylediği mahalle-i mezbûre sükkânından Abdurrahman Efendi b. Ahmed ve İsmail Çelebi b. Mustafa ve Ahmed Çelebi b. İbrahim nâm kimesneler ihbârı ile müte‘ayyen oldukdan sonra süknâ-yı menzil-i mezbûr ulemâdan olup süknâya eşedd-i ihtiyâc ile muhtâc olan işbu râfi‘u’l-vesîka Hasan Efendi b. Hüseyin nâm kimesneye taraf-ı şer‘den tevcîh olunup tasarrufu için bu vesîka-i enîka ketb ü terkīm olunup yedine def‘ olundu. Fi’l-yevmi’l-işrîn mine’l-Muharremi’l-harâm sene [1]108. Şuhûdü’l-hâl: Abdurrahman Efendi b. Ahmed el-müezzin, Köse Mehmed b. Mustafa, Mahmud b. Hasan, Abdülkerim b. Ali, Suhte Mehmed b. ( ), İsmail Çelebi b. Mustafa, Ahmed Çelebi b. İbrahim ve gayruhum mine’l-huzzâr.