İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 572 Hüküm no: 435 Orijinal metin no: [144b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatma bt. Şaban’ın küçük oğlu İbrahim için nafaka tayin edildiği Mahmiye-i İstanbul’da Kâtib Şemseddin mahallesi sâkinelerinden iken bundan akdem vefât eden Fâtıma bt. Şaban nâm hatunun vâlidesi ve sagīr oğlu İbrahim b. Şaban b. Sefer’in ceddesi ve hıdânesi Belkıs Hatun ba‘de’t-ta‘rîfi’ş-şer‘î Dîvân-ı kāimmakām-ı hazret-i sadrazamîde ma‘kūd-ı meclis-i şer‘-i şerîf-i enverde sagīr-i mezbûr İbrahim’in babası merkūm Şaban mahzarında takrîr-i kelâm ve ta‘bîr ani’l-merâm edip işbu sagīr-i merkūm İbrahim bi-hakkı’l-hıdâne benim hacr ve terbiyemde olmağla babası mezbûr Şaban üzerine kıbel-i şer‘den kadr-ı ma‘rûf nafaka farz ve takdîr olunmak matlûbumdur dedikde gıbbe’t-tasdîkiş-şer‘î hâkim-muvakkı‘-i sadr-ı kitâb tûbâ-lehû ve hüsnü-meâb hazretleri dahi sagīr-i mezbûr İbrahim için babası mezbûr Şaban üzerine kendi rızâsıyla para üçer akçe hesâbı üzere târih-i kitâbdan beher yevm beş akçe farz ve takdîr edip meblağ-ı mefrûz-ı mezbûr yevmî beş sağ akçeyi istidâne ve sagīr-i mezbûr İbrahim’e sarfa ve lede’z-zafer mezbûr Şaban üzerine rücû‘a mezbûre Belkıs Hatun’a izin vermeğin mâ-hüve’l-vâki‘ bi’t-taleb ketb olundu. Fî 16 min-Muharremi’l-harâm sene [1]108. Şuhûdü’l-hâl: Tezkire-i evvel Yusuf Efendi, Tezkire-i sânî Hâfız Efendi, Çavuşbaşı Mehmed Ağa, Muhzır Mehmed Ağa, Mehmed Çavuş b. Abdullah, Ali Çavuş b. Mehmed, Mehmed Çavuş b. ( ), el-Hâc Halil Efendi.