İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 572 Hüküm no: 436 Orijinal metin no: [144b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Mustafa’nın, vefat eden Sipahiler Kethudası Hasan Ağa b. Abdullah b. Abdurrahman’da olan alacağının terekeden tahsili Mahmiye-i İstanbul’da Sekbânbaşı Yakub Ağa mahallesi sükkânından işbu râfi‘u’l-kitâb Halil b. Mustafa nâm kimesne Dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde Havâss-ı Aliyye kazâsına tâbi‘ Terkos nâhiyesinde bundan akdem emîn-i beytü’l-mâl olup bilâ-vâris fevt olanların terekelerini kabzına memûr olmağla mahmiye-i İstanbul’da Monla Gürânî mahallesinde sâkin iken fevt olan Sipâhîler Kethudâsı Hasan Ağa b. Abdullah b. Abdurrahman’ın zevcesi Bedrimah bt. Abdullah nâm hatundan gayri vâris-i ma‘rûfu olmamağla terekesinin rub‘u mezbûre Bedrimah’a ve selâse-i erbâ‘ı cânib-i beytü’l-mâle âid oldukdan sonra müteveffâ-yı mezbûrun nâhiye-i merkūmeye tâbi‘ Çilingir nâm karyede vâki‘ çiftlikde olan terekesinin selâse-i erbâ‘ına li-emâneten vâzı‘u’l-yed olan Ömer Ağa b. İsmail b. Abdullah tarafından husûs-ı âti’z-zikre vekîl olduğu Mehmed Çavuş b. Mustafa ve Salih Çavuş b. Ömer şehâdeteriyle şer‘an sâbit olan Hamza Ağa b. Mehmed mahzarında üzerine da‘vâ ve takrîr-i kelâm edip bundan akdem müteveffâ-yı mezbûr Hasan Ağa’ya hâl-i hayatında mahmiye-i mezbûrede Sarrâchanebaşı’nda kable’l-harîk sâkin olduğu menzilinde kendi malımdan yüz yirmi guruşu ikrâz ve teslîm [145a] ol dahi iktirâz ve tesellüm eyledikden sonra meblağ-ı mezbûrun altmış guruşunu yedinden ahz u kabz edip mâ‘adâsı olan altmış guruşu bana kable’l-edâ zimmetinde iken mezbûr Hasan Ağa fevt olup çiftlik-i mezkûrda olan terekesinin selâse-i erbâ‘ına müvekkil-i mezbûr Ömer Ağa vâzı‘u’l-yed olmağın hâlâ suâl olunup meblağ-ı mezbûr altmış guruşu müvekkil-i mezbûr Ömer Ağa tereke-i mezbûrdan bana edâya vekîl-i mezbûra tenbîh olunmak matlûbumdur dedikde gıbbe’s-suâl vekîl-i mezbûr Hamza Ağa cevâbında fi’l-hakīka müvekkil-i mezbûr Ömer Ağa’nın vech-i meşrûh üzere müteveffâ-yı mezbûr Hasan Ağa’nın terekesinin selâse-i erbâ‘ına bi’l-emânet vâzı‘u’l-yed olduğunu ikrâr lâkin deyn-i mezbûru inkâr edicek müdde‘î-i mezbûrdan müdde‘âsına mutâbıka beyyine taleb olundukda udûl-i Müslimîn’den sipâhiler çavuşlarından olup mahmiye-i mezbûreden Kumkapı kurbünde Süleyman Ağa mahallesinde sâkinler Mehmed Çavuş b. Mehmed ve Sinan Bey b. Mustafa nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-hakīka işbu müdde‘î-i mezbûr Halil bundan akdem müteveffâ-yı mezbûr Sipâhîler Kethudâsı Hasan Ağa b. Abdullah b. Abdurrahman’a hâl-i hayatında zikrolunan Sarrâchanebaşı’nda kable’l-harîk sâkin olduğu menzilinde malından yüz yirmi guruşunu bizim huzûrumuzda ikrâz ve teslîm edip mezbûr Hasan Ağa dahi iktirâz ve kabz ve tesellüm etmiş idi. Biz bu husûsa bu vech üzere şâhidleriz şehâdet dahi ederiz deyü her biri ikrâr-ı şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra meblağ-ı mezbûrdan kabzına mu‘terif olduğu altmış guruşdan mâ‘adâ meblağ-ı bâkī-i mezbûr altmış guruşu dahi mezbûr Hasan Ağa’dan hayatında küllen veyâ ba‘zan ahz u kabz veyâ hîbe veyâ âhara havâle etmeyip ve’l-hâsıl taraf-ı şer‘iyeden bir tarîk ile müteveffâ-yı mezbûrun zimmetini ibrâ ve ıskāt etmediğine müdde‘î-i mezbûr Halil’e yemîn teklîf olundukda ol dahi hasbe’l-mesûl yemîn billâhi te‘âlâ mûcebiyle ba‘de’t-tahrîr ve’t-tenbîh mâ-hüve’l-vâki‘ bi’t-taleb ketb ü tahrîr olundu. Fi’l-yevmi’s-sâdis aşer min-Muharremi’l-harâm sene [1]108. Şuhûdü’l-hâl: Yusuf Efendi Tezkire-i evvel, Hâfız Efendi Tezkire-i sânî, Mehmed Ağa Ser-çavuşân, Muhzır Mehmed Ağa, Mehmed Çavuş.