İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 574 Hüküm no: 437 Orijinal metin no: [145a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım bt. Mahmud Ağa’nın evini Hamide Hanım bt. Mustafa Efendi’ye sattığı Husûs-ı âti’z-zikrin mahâllinde ketb ü tahrîri iltimâs olunmağın savb-ı şer‘den irsâl olunan fahrü’l-müderrisîn İbrahim Efendi b. Mehmed el-Hamîdî mahmiye-i İstanbul’da Beyceğiz mahallesinde sâkine merhûm ve mağfûrun-leh İsmetî Efendi halîle-i celîlesi kıdvetü’l-muvakkırât zübdetü’l-muhadderât Hadîce Hanım bt. el-merhûm Mahmud Ağa’nın menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde mûmâ-ileyhâ Hadîce Hanım ba‘de’t-ta‘rîfi’ş-şer‘î meclis-i ma‘kūd-ı mezbûrda hâlâ Rumeli kādıaskeri olan a‘lemü’l-ulemâi’l-izâm sa‘âdetlü es-Seyyid Ali Efendi hazretlerinin halîle-i celîleleri umdetü’l-muhadderât Hamide Hanım bt. el-merhûm Mustafa Efendi tarafından husûs-ı âti’l-beyâna vekîl olduğu müşârun-ileyhânın zâtını mu‘arrefe-i şer‘iye ile ârifân İmâm Ahmed Efendi b. Halil ve Çukadar Halil Beşe b. Nuh nâm kimesneler şehâdetleriyle şer‘an sâbit olan el-Hâc Veli Ağa b. Eyüb mahzarında bi’t-tav‘i’s-sâf ikrâr ve takrîr-i kelâm akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ iki tarafdan tarîk-i âm ve bir tarafdan ba‘zan Teşrîfâtçı Ahmed Efendi ve ba‘zan Rumeli kazâsından Mehmed Efendi menzilleri ve bir tarafdan ba‘zan vakıf odalar ve ba‘zan Mısır kazâsından Sü‘rânîzâde? Abdurrahman Efendi menzili ile mahdûd dâhiliyede sagīr ve kebîr tahtânî altı bab oda ve bir hamam ve bir mahzen ve bir su kuyusu ve matbah ve bahçe ve iki sofa ve kilâr ve kurbünde iki bâb oda ve hâriciyede sagīr ve kebîr yedi bâb fevkānî oda ve bir dîvânhâne ve kurbünde üç bâb fevkānî oda ve sofa ve tahtânî altı bâb oda ve iki ahır ve bahçe ve fıskıye ve köşk ve iki su kuyusu ve matbah ve kapıcı odası ve fevkinde iki bâb odayı müştemil menzili bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-ı kat‘î ile müşârun-ileyhâ Hamide Hanım’a iki bin iki yüz elli guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl etdiğinden sonra semeni olan meblağ-ı mezbûr iki bin iki yüz elli guruşu yedimden bi’t-tamam ahz u kabz eyledim ba‘de’l-yevm menzil-i mahdûd-ı mezkûrede alâkam kalmayıp müşârun-ileyhânın mülk-i müşterâsı ve hakk-ı sarfı olmuşdur, keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an ba‘s olunan Ahmed b. Ahmed ve Osman b. Hasan ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. [145b] Fi’l-yevmi’l-ışrîn min-Muharremi’l-harâm li-sene semân ve mie ve elf min-hicreti men lehu’l-izzü [ve’ş-şeref]. Şuhûdü’l-hâl: Sâbıkā Halebü’ş-şehbâ kadısı olan a‘lemü’l-ulemâi’l-izâm İsmail Efendi b. İbrahim Efendi, Mustafa Çelebi b. Mustafa, Diğer Mustafa Çelebi b. Ali, Ali Çelebi b. Ali, Ahmed Çelebi b. Ahmed.