İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 575 Hüküm no: 438 Orijinal metin no: [145b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni toplar dökmek için Gümüşhane’den getirilen bakırların Tophane Nazırı Yusuf Efendi b. Abdurrahman tarafından teslim alındığı Husûs-ı âti’z-zikrin mahâllinde ketb ü tahrîri için sâdır olan fermân-ı âlîye imtisâlen savb-ı şer‘den ayak nâibi olan fahrü’l-kuzât Mustafa Efendi b. Mehmed irsâl olunup ol dahi mahmiye-i İstanbul’da Eminönü nâm mevzi‘de gümrük emîni olanlara mahsûs odaya varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde hâlâ Tophâne nâzırı olan umdetü’l-emâcid ve’l-ekârim câmi‘ü’l-mehâmid ve’l-mekârim Yusuf Efendi b. Abdurrahman tarafından husûs-ı âti’l-beyâna vekîl-i şer‘îsi olan fahrü’l-eşbâh Mehmed Efendi b. Abdullah meclis-i ma‘kūd-ı mezbûrda sefîne reislerinden Mustafa Reis b. Abdurrahman ve Hüseyin b. Bünyad nâm kimesneler mahzarlarında bi’l-vekâle ikrâr-ı tâm ve takrîr-i kelâm edip sâbıkā Gümüşhâne mukāta‘ası emîni olan Süleyman nâm kimesne mahmiye-i mezbûrede vâki‘ Tophâne-i âmiremde müceddeden dökülmesi fermân olunan topçular için mukāta‘a-i mezbûre mahsûlünden hâsıl olan bakırdan medîne-i Trabzon iskelesine ba‘de’n-nakl mezbûrânın sefînesine tahmîl ve Tophâne-i âmireye teslîm etmek üzere gönderdiği bakırdan bi-hesâb-ı külçe bakır işbu mîrî kantar ile vezn olundukda on iki bin otuz dokuz buçuk vakıyye bakır olmağla zikrolunan on iki bin otuz dokuz buçuk vakıyye bakırı bi’l-vekâle mezbûrân Mustafa ve Hüseyin yedlerinden bi’t-tamam ahz u kabz eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ü tahrîr ba‘dehû ma‘an irsâl olunan Mehmed b. Mehmed ve Ahmed b. Ahmed ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fî 16 min-Muharremi’l-harâm sene [1]108. Şuhûdü’l-hâl: İbrahim Çelebi b. Ahmed, Mehmed Ağa b. Ali, Ali Çelebi b. Bali, Ahmed Çelebi b. Ahmed, Mehmed b. İdris, Mustafa Çelebi b. Ahmed.