İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 579 Hüküm no: 441 Orijinal metin no: [147a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferhad Ağa Mescidi Evkafı’na ait evin duvarına Abdi Çelebi b. Hızır’ın müdahale etmemesi Mahmiye-i İstanbul’da Ferhad Ağa mahallesinde vâki‘ merhûm ve mezbûr Ferhad Ağa Mescid-i şerîfi Evkāfı’nın mütevellîsi olan işbu râfi‘u’l-kitâb Mahmud Çavuş b. Sefer nâm kimesne meclis-i şer‘de mahalle-i mezbûre sâkinlerinden Abdi Çelebi b. Hızır nâm kimesne muvâcehesinde takrîr-i kelâm ve bast-ı merâm edip mahalle-i mezbûrede vâki‘ bir tarafdan mescid-i mezbûr ve bir tarafdan Mehmed Efendi nâm kimesne tasarrufunda olan hadîka ve bir tarafdan mezbûr Ali Çelebi mülkü ve bir tarafdan benim tasarrufumda olan arsa ile mahdûd vakf-ı mezbûrdan olup süknâsı mescid-i mezbûrda imâm ve hatîb olanlara meşrûta menzilin mezbûr Abdi Çelebi tarafından vâki‘ kârgir ile muhtelit tûlen kırk dört zirâ‘ taş duvar menzil-i mahdûd-ı mezkûrun müştemilâtından olup kadîmü’l-eyyâmdan taraf-ı vakıfdan tasarruf olunagelmiş iken ba‘zı mevâzi‘i münhedim olmağla hâlâ mezbûr Abdi Çelebi kâhyası mülk menzilin müştemilâtından olmak üzere münhedim olan mevâzi‘-i mezkûresini ta‘mîr ü termîme şurû‘ ve fuzûlî vaz‘-ı yed etmekle kıbel-i şer‘-i şerîfden üzerine varılıp ba‘de’l-keşf ve’l-mu‘âyene kasr-ı yedine tenbîh olunmak murâdımdır deyü mazmûnu min-külli’l-vücûh takrîr-i meşrûhlarına mutâbık fermân-ı âlî ibrâz etmeğin savb-ı şer‘den keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlarından Dede Mehmed Halîfe b. İshak ve Mustafa Halîfe b. Abdülmennan ve zeyl-i vesîkada muharrerü’l-esâmî olan bî-garaz Müslimîn ile üzerine varıp zikrolunan kârgir ile muhtelit tûlen kırk dört zirâ‘ duvarın ba‘zı mevâzi‘i münhedim olmağla mezbûr Abdi Çelebi mevâzi‘-i mezkûresini ta‘mîr ü termîmine şurû‘ edip fuzûlî vaz‘-ı yed eylediğini mi‘mârân-ı mezbûrân ve Müslimîn-i mezkûrîn ile mevlânâ-yı mûmâ-ileyh mahâllinde mu‘âyene ve müşâhede eylediklerinden sonra bi-ecmâ‘ihim meclis-i şer‘-i şerîfe gelip haber verdiklerinde mütevellî-i mezbûr Mahmud Çavuş mezbûr Abdi Çelebi mahzarında da‘vâ ve takrîr-i kelâm edip mi‘mârân-ı mezbûrân ve Müslimîn-i mezkûrîn ve mevlânâ-yı mûmâ-ileyh mu‘âyene ve müşâhede eyledikleri vech üzere duvar-ı mezkûr kadîmü’l-eyyâmda menzil-i mevkūf-ı mahdûd-ı mezkûrun müştemilâtından olup taraf-ı vakıfdan tasarruf olunagelmiş iken ba‘zı mevâzi‘ münhedim olmağla hâlâ mezbûr Abdi Çelebi kendi menzilinin müştemilâtından olmak üzere münhedim olan mevâzi‘-i mezkûresini ta‘mîr ü termîme şurû‘ ve fuzûlî vaz‘-ı yed etmekle suâl olunup kasr-ı yedine tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyene beyyine taleb olundukda udûl-i Müslimîn ve sikāt-ı muvahhidînden mahalle-i mezbûre ve etrâfında olan mahallât ahâlîsinden Salih Efendi b. el-Hâc Mehmed ve Cafer Çelebi b. Abdullah ve el-Hâc Mehmed b. Mahmud ve Ali Efendi b. Mehmed ve Ahmed Efendi b. Abdurrahman ve el-Hâc Yusuf b. Abdullah ve el-Hâc Mahmud b. Mehmed nâm kimesneler li-ecli’ş-şehâde meclis-i şer‘e hâzırûn olup istişhâd olunduklarında zikrolunan duvar vech-i meşrûh üzere mahalle-i mezbûrede vâki‘ süknâsı merhûm-ı mezbûr Ferhad Ağa Mescid-i şerîfinde imâm olanlara meşrûta ve bir tarafdan Mehmed Efendi tasarrufunda olan hadîka ve bir tarafdan mezbûr Abdi Çelebi mülkü ve bir tarafdan mütevellî-i mezbûr Mahmud Çavuş tasarrufunda olan arsa ile mahdûd mârrü’z-zikr menzilin müştemilâtından olup kadîmü’l-eyyâmdan taraf-ı vakıfdan tasarruf olunagelmişdir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mezbûr Abdi Çelebi’nin duvar-ı mezkûrdan kasr-ı yedine tenbîh birle mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Zilhicce sene [1]107. Şuhûdü’l-hâl: el-Hâc Ali b. Abdullah, el-Hâc Abdullah b. Mehmed, Ahmed Efendi b. Habib, es-Seyyid Receb b. es-Seyyid Mehmed, Mehmed b. İbrahim, Yusuf b. Abdullah ve gayruhum.