İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 581 Hüküm no: 442 Orijinal metin no: [147b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Ağya’nın evinin bir bölümüne komşusu Ohan v. Haçador’un müdahale etmemesi gerektiği Husûs-ı âti’l-beyânın mahâllinde ketb ü tahrîri bâbında fermân-ı âlî sâdır olmağın imtisâlen-leh savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Mehmed Halîfe b. İshak ve Ali Halîfe b. Abdullah ile mahmiye-i İstanbul’da Sancakdâr Hayreddin mahallesi sâkinlerinden Kirkor v. Ağya nâm zimmînin nenziline varıp zeyl-i vesîkada muharrerü’l-esâmî olan bî-garaz Müslimîn huzûrlarında akd-i meclis-i şer‘-i mübîn eyledikde işbu bâ‘isü’s-sifr Kirkor meclis-i ma‘kūd-ı mezbûrda yine mahalle-i mezbûre sükkânından Ohan v. Haçador nâm zimmî muvâcehesinde üzerine da‘vâ ve takrîr-i kelâm edip mahalle-i mezbûrede vâki‘ bir tarafdan Behram Kethudâ Vakfı ve bir tarafdan ba‘zan Oskan ve ba‘zan Morak nâm zimmîler mülkleri ve bir tarafdan merkūm Ohan mülkü ve bir tarafdan tarîk-i âm ile mahdûd iki bâb fevkānî oda ve iki sofa ve bir dehliz iki bâb tahtânî oda ve bir sofa ve bir su kuyusu ve bir mikdâr cüneyneyi müştemil işbu mülk menzil yedimde olan iki kıt‘a hüccet nâtıka olduğu üzere mülk-i müşterâm iken mârrü’z-zikr sofalardan ve dehlizden tûlen on altı ve arzen bir buçuk be-hesâb-ı terbî‘î dört zirâ‘ binâ ma‘a’l-arsaya ve yine menzil-i mahdûd-ı mezkûr mülhakātından İpekçi Tanaş nâm zimmî tarafında matbah ve dibinde vâki‘ be-hesâb-ı mezbûr elli zirâ‘ arsa-i hâliyeye mezbûr Ohan bi-gayr-ı hakkın vaz‘-ı yed etmekle suâl olunup kasr-ı yedine tenbîh olunmak matlûbumdur dedikde gıbbe’s-suâl mezbûr Ohan cevâbında fi’l-hakīka mârrü’z-zikr sofalarda ve dehlizde be-hesâb-ı mezbûr yirmi dört zirâ‘ binâ ma‘a’l-arsa ve sâbıku’z-zikr matbah kurbünde vâki‘ be-hesâb-ı mezbûr elli zirâ‘ arsa-i hâliye zikrolunan hüccetler nâtıka olduğu üzere müdde‘î-i mezbûrun mülk-i müşterâsı olup kendinin alâka ve medhali olmadığına tâyi‘an ikrâr ve i‘tirâf etmeğin mûcebiyle zikrolunan sofalardan ve dehlizden yirmi dört zirâ‘ binâ ma‘a’l-arsadan ve matbah dibinde olan elli zirâ‘ arsa-i hâliyeden kasr-ı yedine tenbîh olundukdan sonra mezbûr Kirkor i‘âde-i kelâm edip menzil-i mahdûd-ı mezbûr hudûdu dâhilinde be-hesâb-ı mezbûr iki yüz doksan yedi zirâ‘ işbu cüneyne mezbûr Ohan ile beynimizde müşterek olup bundan esbak beynlerimizde işbu müşâhede olunan vech üzere bi’t-terâzî taksîm olundukda her birimizin hisselerimize yüz kırk sekiz buçuk zirâ‘ cüneyne isâbet edip alâmât-ı fâsıla vaz‘ıyla hisse-i müfreze-i mu‘ayyenelerimizi kabz ve kabûl etmiş idik, hâlâ taksîm-i sâbıkā her birimiz râzılar olup husûs-ı mezbûra müte‘allik âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasâdiki’ş-şer‘î vâki‘ hâli mevlânâ-yı mezbûr mahâllinde ketb ü tahrîr ve ma‘an ba‘s olunan Mehmed b. İbrahim ve Yusuf b. Abdurrahim ile meclis-i şer‘e gelip âlâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fî 2 mine’l-Muharrem sene [1]108. Şuhûdü’l-hâl: İmâm Mehmed Efendi b. Receb, İmâm Mustafa Efendi b. el-Hâc Mehmed Efendi, Ömer Ağa b. Süleyman, Mustafa Çelebi b. Mehmed, Mustafa Ağa b. Bayram, Abdurrauf b. Abdullah, Şâtır Mustafa Ağa b. ( ), Receb Efendi nâib-i kapan.