İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 584 Hüküm no: 444 Orijinal metin no: [148a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da boyalı ipek bükücülüğü Yahudi taifesine ait olduğundan Frengî ibrişim, sade ibrişim, kenar ipeği ve bürüncük bükücü olanların müdahale etmemesi. Mahmiye-i İstanbul’da ham ipek bükücü tâifesinden yamak olan boyalı dokumalık ipek bükücü tâifesinden Yahûda v. Mosi ve David v. Yako ve Yoseb v. David ve Salamon v. İsak ve Şabatay v. Yako ve Yako v. Simon nâm Yahûdiler meclis-i şer‘-i şerîf-i enverde zikrolunan ham ikep bükücü tâifesinden Tamas v. Kiragos ve Drako v. Yanaki ve Karabit v. Lorsinid ve Antoni v. Kiragos ve sâirleri muvâcehelerinde takrîr-i da‘vâ ve tasdîr-i müdde‘â edip kadîmü’l-eyyâmdan ilâ hâze’l-ân bizim san‘atımız olan dokumalık boyalı ipek bükücü ancak sekizer destgâh olmağla erbâbı yahud tâifesi olup dokumalık boyalı ipek bükmek ancak bize mahsûs ve müte‘ayyen olup ve ham ipek ta‘bîr olunan Frengî ibrişim ve sade ibrişim ve kenar ipeği ve bürüncük bükmek Müslim ve Ermeni ve Rum tâifelerine mu‘ayyen ve mahsûs olup her birimiz âharın san‘atına kat‘an karışagelmeyip ittifâk ü ittihâd ve akd ü mîsâkımız bunun üzerine olmağla nizâm-ı hâlimiz bu vech üzere muntazam iken mezbûrûn zimmîler kendülere mahsûs olan san‘atlarına kanâ‘at etmeyip bize mahsûs olan dokumalık boyalı ipek bükmemize dahl ve bizi men‘ murâd etmeleriyle beynimizde ihtilâle bâdîler olmağın hâlâ hakīkat-i hâl [148b] kethudâ ve müsinn ve ihtiyârımızdan suâl olunup haberleri tahrîr ve kadîmden olageldiği vech üzere nizâm-ı hâlimiz için her birimiz âharın san‘atına dahl ve ta‘arruz etmemek üzere tenbîh olunmak matlûbumuzdur dediklerinde husûs-ı merkūma vukūf-ı tâmmı olan bî-garaz Müslimîn’den olup meclis-i şer‘e hâzırûn olan kethudâ İsmail Çelebi b. İbrahim ve ihtiyârlarından Ali Çelebi b. Hüseyin ve Mehmed Çelebi b. Bayram ve Usta Mahmud b. Mustafa ve Yiğitbaşı Mustafa b. Bayram ve sâirlerinden suâl olundukda fi’l-hakīka kadîmü’l-eyyâmdan ilâ hâze’l-ân dokumalık boyalı ipek bükücü sekiz destgâh ve erbâbı yahud tâifesi olup dokumalık ipek bükmek müdde‘ûn-ı mezbûrûn Yahûdilere mu‘ayyen ve mahsûs olup her biri âharın san‘atına kat‘an karışagelmeyip ittifâk u ittihâd ve ahd ü mîsâkları bunun üzerine olmağla nizâm-ı hâlleri bu vech üzere olageldimişdir deyü her biri muvâcehelerinde haber verdiklerinden sonra kazıyye bâlâda tafsîl ü beyân ve şerh ü ayân olunan vech üzere olduğunu mezbûrûn zimmîler dahi ikrâr ve i‘tirâf etmeğin mûcebiyle kadîmde olageldiği vech üzere her biri âharın san‘atına dahletmeyip bâ‘is-i ihtilâl olmamak üzere mezbûrûn zimmîlere ba‘de’t-tenbîh mâ vaka‘a bi’t-taleb ketb olundu. Fi’l-yevmi’l-işrîn mine’l-Muharremi’l-harâm sene [1]108. Şuhûdü’l-hâl: el-Hâc Mehmed b. İbrahim, Ali Beşe b. Mehmed, Ebûbekir Beşe b. Sinan, Mustafa Çelebi b. Mehmed, Mustafa Çelebi b. Şaban.