İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 585 Hüküm no: 445 Orijinal metin no: [148b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. Bünyamin’e borçlu Mustafa Ağa b. Muslı b. Abdullah’ın borcunu kefilinin ödemesi Mahmiye-i İstanbul’da Balat kapısı hâricinde sâkin tâife-i Yahûd’un Sinyora cemâ‘atinden işbu râfi‘u’l-vesîka İsak v. Benyamin nâm Yahûdî Dîvân-ı kāimmakām-ı hazret-i sadrazamîde ma‘kūd-ı meclis-i şer‘-i şerîf-i enverde Edirnevî tüccârdan Ali Efendi b. Abdurrahman nâm kimesne mahzarında üzerine da‘vâ ve takrîr-i kelâm edip yedimde olan işbu deyn temessükü nâtık olduğu üzere hâlâ kasaba-i Koçhisar’da sâkin Kadızâde demekle şehîr Mustafa Ağa b. Muslı b. Abdullah zimmetinde cihet-i karz-ı şer‘îden üç yüz seksen guruş hakkım olup meblağ-ı mezbûr üç yüz seksen guruşa gāib ani’l-meclis İbrahim Ağa b. Abdurrahman ile işbu mezbûr Ali Efendi emr ve kabûlü hâvî kefâlet-i sahîha-i şer‘iye ile kefîller olup hatta târih-i kitâb şehri gurresinden meblağ-ı mezbûrun nısfı olup bi-hükmi’l-kefâleti’l-mezkûre zimmetinde edâsı lâzım gelen yüz doksan guruşu mezbûr Ali Efendi’den taleb eylediğimde ber-vech-i muharrer meblağ-ı mezbûr üç yüz seksen guruş hisse mezbûr İbrahim Ağa ile ma‘an kefîl olmağla meblağ-ı mezbûrdan zimmetine lâzım gelen yüz doksan guruş bi-hükmi’l-kefâleti’l-mezkûre bana deyni olduğunu mezbûr Ali Efendi alâ ruûsi’l-işhâd ikrâr ve işhâd dahi etmiş idi, hâlâ suâl olunup meblağ-ı mezbûr yüz doksan guruş bi-hükmi’l-kelâfeti’l-mezkûre bana edâya mezbûr Ali Efendi’ye tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda udûl-i Müslimîn’den olup mahmiye-i mezbûrede Avcı Bey mahallesi sükkânından Ahmed Ağa b. Mehmed ve Mehmed Ağa b. Davud ve Abdullah Ağa b. İbrahim nâm kimesneler li-ecli’ş-şehâde meclis-i mezbûra hâzırûn olup isre’l-istişhâd fi’l-hakīka müdde‘î-i mezbûr İsak’ın hâlâ Koçhisar kasabasında sâkin Kadızâde demekle şehîr mezbûr Mustafa Ağa b. Muslı b. Ubeydullah zimmetinde cihet-i karz-ı şer‘den hakkı olan üç yüz seksen guruşuna gāib-i mezbûr İbrahim Ağa b. Abdurrahman ile ben emr ve kabûlü hâviye kefâlet-i sahîha-i şer‘iye ile kefîl olmuş idi, meblağ-ı mezbûrun nısfı olan yüz doksan guruş bi-hükmi’l-kefâleti’l-mezkûre müdde‘î-i mezbûr İsak zimmetimde lâzımü’l-edâ deynimdir deyü işbu mezbûr Ali Efendi târih-i kitâb şehri gurresinde bizim huzûrumuzda ikrâr ve i‘tirâf edip bizi işhâd etmiş idi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye mûcebiyle ba‘de’l-hükm ve’t-tenbîh mâ vaka‘a bi’t-taleb ketb olundu. Fî 23 mine’l-Muharremi’l-harâm sene [1]108. Şuhûdü’l-hâl: Tezkire-i evvel Yusuf Efendi, Tezkire-i sânî Hâfız Efendi, Mehmed Ağa-yı Çavuşân, Mustafa Ağa Odabaşı, Mustafa Efendi nâib-i recül, Receb Efendi nâib-i kapan, Mehmed Efendi b. Hüseyin, el-Hâc Ali Beşe b. Mehmed, Ebûbekir Beşe b. Şaban.