İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 586 Hüküm no: 446 Orijinal metin no: [149a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaşlı olan Latif bt. Ebubekir’in oğulları Osman ve Ahmed’e nafaka bağlandığı Mahmiye-i İstanbul’da Ali Paşa mahallesi sâkinelerinden Latîf bt. Ebîbekir nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde sadrî kebîr oğulları olup sâbıkā Tavas kadısı olan Osman Efendi b. Mehmed ve Saray-ı cedîd-i sultânîde tabbâh olan Ahmed b. Hüseyin mahzarlarında takrîr-i kelâm ve ta‘bîr ani’l-merâm edip ben fakīre ve müsinne olup bir vechile kâr ü kisbe iktidârım olmayıp ve kebîr oğlum mezbûr Osman Efendi ve Ahmed üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘ sadr-ı kitâb tûbâ-lehû ve hüsn me’âb hazretleri dahi cümlenin rızâsıyla para üçer akçe hesâbı üzere mezbûre Latîf Hatun’un nafaka ve kisvesi için mezbûr Osman Efendi üzerine beher yevm on beş akçe ve mezbûr Ahmed üzerine beher yevm üçer akçe ki cem‘an târih-i kitâbdan yevmî on sekizer sağ akçe nafaka ve kisve-bahâ farz ve takdîr edip meblağ-ı mefrûz-ı mezbûr yevmî on sekiz sağ akçeyi istidâne ve sarfa ve lede’z-zafer oğulları mezbûr Osman Efendi ve Ahmed Efendi üzerine rücû‘a mezbûre Latîf Hatun’a kıbel-i şer‘den izin verilip mâ-hüve’l-vâki‘ bi’t-taleb ketb olundu. Fi 3 mine’l-Muharremi’l-harâm sene [1]108. Şuhûdü’l-hâl: Mustafa Beşe b. Mehmed, el-Hâc Halil Efendi b. Mehmed, el-Hâc Mehmed Çelebi b. İbrahim, el-Hâc Ebûbekir b. Sinan, el-Hâc Ali Beşe b. ( ), İbrahim Çelebi b. Ahmed, Mustafa b. Şaban.