İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 586 Hüküm no: 447 Orijinal metin no: [149a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail’in ortakları olan Elvanzâde mahallesinden Mehmed b. Ali ve Halil Çelebi b. İbrahim’e olan borcunu ödemesi gerektiği Mahmiye-i İstanbul’da Elvanzâde mahallesinde sâkin işbu râfi‘u’l-kitâb el-Hâc Mehmed b. Ali ve Halil Çelebi b. İbrahim nâm kimesneler meclis-i şer‘-i şerîf-i enverde şerîkleri el-Hâc İsmail b. Ali nâm kimesne mahzarında üzerine her biri da‘vâ ve takrîr-i kelâm edip mezbûr el-Hâc İsmail zimmetinde beynimizde ma‘lûm şayka ta‘bîr olunur sefîne yedimizden müşterâ ve makbûz bir rub‘ hissesi semeninden bâkī yirmi guruş hakkımız olduğundan mâ‘adâ sefîne-i mezbûrenin sülüsânı bizim ve sülüsü mezbûr el-Hâc İsmail’in mülkü olup ve mezbûr el-Hâc İsmail sefîne-i mezbûrede reis ve bize âid olan navul ve fâidede hissemizi kabza vekîlimiz olmağla sefîne-i merkūme navlundan ve bey‘ olunan buğday fâidesinden bizim sülüsân hissemize âid olan bir def‘a beş bin akçe ve bir def‘a on dokuz guruşu mezbûr el-Hâc İsmail ahz u kabz ve bize teslîm etmeyip kendi mesârifine sarfla istihlâk edip ol vechile zimmetide otuz dokuz guruş ile beş bin akçe hakkımız müctemi‘ olmağın hâlâ taleb eylediğimizde bize edâdan imtinâ‘ eder suâl olunup alıverilmesi matlûbumuzdur dediklerinde gıbbe’s-suâl mezbûr el-Hâc İsmail cevâbında fi’l-hakīka kazıyye bâlâda tafsîl olunan vech üzere olup sefîne-i mezbûrenin rub‘ hissesi semeninden bâkī yirmi guruş ve ber-vech-i mübeyyen navul ve buğday fâidesinden müdde‘iyân-ı mezbûrânın sülüsân hisselerine âid olan bir def‘a beş bin akçe ve bir def‘a on dokuz guruşu ben ahz u kabz ve kendi mesârifime sarfla istihlâk eyledim, ol vechile meblağ-ı mecmû‘-ı mezbûr beş bin akçe ile otuz dokuz guruşu elân müdde‘iyân-ı mezbûrâna zimmetimde lâzımü’l-edâ deynimdir deyü bi’t-tav‘i’s-sâf ikrâr ve i‘tirâf etmeğin alâ mûceb-i i‘tirâfihî meblağ-ı merkūm beş bin akçe ile otuz dokuz guruşu müdde‘iyân-ı mezbûrâna edâya ve îfâya mezbûr el-Hâc İsmail’e tenbîh birle mâ-hüve’l-vâki‘ bi’t-taleb ketb olundu. Fî 18 mine’l-Muharremi’l-harâm sene [1]108. Şuhûdü’l-hâl: Mehmed Çelebi b. İbrahim, Mustafa Çelebi b. Mehmed, Ali Beşe b. Mehmed, İbrahim Çelebi b. Ahmed.