İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 588 Hüküm no: 449 Orijinal metin no: [149b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akmescid’in Kıyat köyünden Ümmü Sultan Hanım’ın cariyesi Kaçka’nın çocuğu Bedahşan, azat edilmiş olduğundan satışının söz konusu olmadığı El-emrü hasbemâ hurrire fîhi hurrirehû el-fakīr ileyhi sübhânehû es-Seyyid Abdurrahman el-kadı be-mahrûse-i Karasu ufiye anhü. Kazâ-i Akmescid tâbi‘âtından Kıyat nâm karye sâkinlerinden fahrü’l-muhadderât Ümmü Sultan Hanım bt. Arslan Bey tarafından ber-nehc-i şer‘î müşârun-ileyhânın şahsını ma‘rifet-i şer‘iye ile ârifân Fethullah Çelebi b. el-Hâc Abdi ve Beybolat b. Mevlüd Gāzi nâm kimesneler şehâdetleriyle sâbitü’l-vekâlet İbrahim Çelebi b. el-Hâc Hasan nâm kimesne meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâd[da] Kalpakçı Yasef nâm Yahûdî muvâcehesinde bi’l-vekâlet husûs-ı âti’l-beyânın tescîline ikrâr-ı sahîh-i şer‘î ve i‘tirâf-ı sarîh-i mer‘î edip işbu hâzırûn bi’l-meclis Kaçka nâm câriye müvekkilem Ümmü Sultan Hanım’ın câriyesi idi, merkūm Yasef’e bey‘ eyledi ve lâkin hacrunda olan sarışın gök elâ gözlü ve sol parmakları yanık Bedahşan nâm radî‘ayı âzad ve sâir harâir-i asliyât zümresine ilhâk eylemişdir, bey‘ olunmuş değildir, hurredir dediğinde gıbbe’s-suâl müşteriyyü’l-merkūm Yasef vekîl-i mukırr İbrahim Çelebi’yi ikrâr-ı meşrûhunda vech-i muharrer üzere tasdîk-i vicâhî ve tahkīk-i şifâhî edicek radî‘a-yı merkūme Bedahşan’ın hurre olduğunu mukarrer olup mâ vaka‘a alâ vukū‘ihî bi’t-taleb ketb olunup yed-i tâlibine def‘ ve i‘tâ olundu, lede’l-ihtiyâc ibrâz ve ihrâc edip ve ihticâc edine, cerâ zâlik. Ve hurrire fî 25 min-Zilka‘deti’ş-şerîfe sene [1]107. Şuhûdü’l-hâl: Kâtib-i hurûf Abdülbaki en-nâib, Molla Osman el-müezzin be-Câmî‘-i kebîr, Debbağ Şaban Dede an mahalle-i Acem, İsmail [b.] İbrahim Efendi, el-Hâc Tohtamış el-Muhzır, Karat? Hoca el-Muhzır.