İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 592 Hüküm no: 452 Orijinal metin no: [151a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Ali’nin çuka parasından olan borcunu Validehanı’nda oturan Nami v. İsa’ya ödemesi gerektiği Mahmiye-i İstanbul’da Validehanı’nda sâkin işbu râfi‘u’l-kitâb Nami v. İsa nâm zimmî meclis-i şer‘-i şerîfde bundan akdem Bağdad vâlîsi olan el-Hâc Ahmed Paşa’nın kapıcılar kethudâsı olup hâlâ mahmiye-i mezbûrede İshak Paşa mahallesinde sâkin el-Hâc İsmail b. Ali nâm kimesne mahzarında üzerine da‘vâ ve takrîr-i kelâm edip bundan akdem mezbûr el-Hâc İsmail zimmetinde beher zirâ‘ı dörder guruşa olmak üzere yedimde müşterâ ve makbûz yüz zirâ‘ mahûd? elvan çuka bahâsından dört yüz guruş hakkım olup meblağ-ı mezbûrun iki yüz guruşunu yedinden ahz u kabz edip iki yüz guruş hakkım bâkī kalmağın hatta zikrolunan çuka bahâsından bâkī iki yüz guruş zimmetinde bana lâzımü’l-edâ deyni olduğunu bin yüz yedi senesi Muharremi’l-harâmının on sekizinci günü mezbûr el-Hâc İsmail alâ ruûsi’l-işhâd ikrâr ve i‘tirâf edip hat ve hatmini hâvî yedime işbu deyn temessükü dahi vermiş idi, hâlâ taleb eylediğimde bana edâda imtinâ‘ eder, suâl olunup meblağ-ı bâkī-i mezbûr iki yüz guruşu dahi bana edâya mezbûr el-Hâc İsmail’e tenbîh olunmak matlûbumdur dedikde gıbbe’s-suâl mezbûr el-Hâc İsmail cevâbında meblağ-ı mezbûr dört yüz guruş paşa-yı mûmâ-ileyhin deyni olmağla meblağ-ı mezbûrûn iki yüz guruşunu paşa-yı mûmâ-ileyhin ibrâsıyla müdde‘î-i mezbûra ben malımdan edâ ve teslîm edip mâ‘adâ iki yüz guruşu yedinden müşterâ ve makbûz çuka bahâsından işbu müdde‘î-i mezbûr Nami’ye zimmetinde lâzımü’l-edâ deynimdir deyü ikrâr ve i‘tirâf edip hat ve hatmini hâvî işbu temessükü vermiş idim, lâkin müdde‘î-i mezbûra deynim olmamağla ikrâr-ı mezkûremde kâzibim deyücek mezbûr el-Hâc İsmail ikrâr-ı mezkûrunda kâzib ve kendi da‘vâ-yı meşrûhasına mubtil olmadığına müdde‘î-i mezbûr Nami’ye şer‘an tahlîf lâzım gelip mezbûr el-Hâc İsmail tahlîfe dahi tâlib olmamağın mûcebiyle meblağ-ı bâkī-i mezbûr iki yüz guruşu müdde‘î-i mezbûra edâ ve teslîme mezkûr el-Hâc İsmail’e tenbîh olunup mâ-hüve’l-vâki‘ bi’t-taleb ketb olundu. Fî 2 min-Saferü’l-hayr sene [1]108. Şuhûdü’l-hâl: Uşşâkīzâde? es-Seyyid İbrahim Efendi el-müderris, es-Seyyid Hüseyin Çelebi b. es-Seyyid Hasan, Mustafa Efendi nâib-i recül, Mehmed Çavuş el-Mübâşir, el-Hâc Halil b. Mehmed.