İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 593 Hüküm no: 453 Orijinal metin no: [151a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Ali ile Ali Beşe b. Hüseyin b. Abdullah’ın, birbirlerinin zimmetini ibra ettikleri Fi’l-asl kasaba-i Mudanya’da Musa Bey mahallesi âhâlîsinden olup hâlâ mahmiye-i İstanbul’da Cübb-i Ali kapısı kurbünde sâkin Mahmud Beşe b. Ali nâm kimesne meclis-i şer‘-i şerîf-i enverde kasaba-i mezbûre sâkinlerinden olup Dergâh-ı âlî yeniçerilerinin altmışıncı solaklarına mahsûs oda ahâlîsinden işbu râfi‘u’l-kitâb Ali Beşe b. Hüseyin b. Abdullah tarafından husûs-ı âti’z-zikri tasdîke vekîl olduğu kasaba-i Fındıklı’da Sâkine Hatun mahallesinde sâkin İbrahim Beşe b. Muslı ve Avnî Efendi mahallesinde sâkin Hüseyin Reis b. Ahmed şehâdetleriyle şer‘an sâbit olan oda-i mezbûre ahâlîsinin odabaşıları Yusuf Beşe b. Abdullah nâm kimesne mahzarında ikrâr ve takrîr-i kelâm edip bin yüz bir senesi Zilhiccesinin yirmi beşinci günü yedimde mülk ve hakkım olup kasaba-i mezbûrede Ömer Bey Câmi‘-i şerîfi kurbünde vâki‘ bir tarafdan Ali Beşe mülkü ve bir tarafdan makābir-i Müslimîn ve iki tarafdan tarîk-i âm ile mahdûd bir birine muttasıl dört bâb mahzenleri merkūm Ali Beşe’ye yüz elli guruşa bey‘ ve teslîm ol dahi iştirâ ve tesellüm edip semen-i mezbûrun ancak altmış guruşunu yedinden ahz u kabz edip doksan guruşu zimmetinde bâkī iken târih-i mezbûrda kasaba-i mezbûrede nâibü’ş-şer‘i’ş-şerîf olan Abdullah Efendi huzûrunda semen-i mezbûr yüz elli guruşu mezkûr Ali Beşe yedinden bi’t-tamam ahz u kabz eyledim deyü ikrâr ve i‘tirâf edip hüccet dahi tahrîr olunmuş idi, lâkin ziyâde doksan guruş ikrârımda kâzib olmağla târih-i kitâb şehri gurresinde ziyâde-i mezbûre doksan guruşu mezbûr Ali Beşe’den taleb eylediğimde ben ber-vech-i muharrer doksan guruş ikrârında kâzib olup [151b] zikrolunan mahzenler semeninden bâkī doksan guruş zimmetinde bana lâzımü’l-edâ deyni olduğunu alâ ruûsi’l-işhâd ikrâr ve işhâd dahi etmekle meblağ-ı mezbûr doksan guruş hâkim-i muvakkı‘-i sadr-ı kitâb tûbâ-lehû ve hüsn me’âb hazretleri huzûrlarında müvekkil-i mezbûr Ali Beşe’den da‘vâ ve müdde‘âmı udûl-i Müslimîn’den Üskübî mahallesi sükkânından el-Hâc Ali Ağa b. Mustafa ve tüccârdan Ahmed Çelebi b. Hüseyin şehâdetleriyle mezbûrun muvâcehesinde şer‘an isbât etmekle meblağ-ı mezbûrun bana edâsına hükm-i hâkimü’ş-şer‘ lâhık olmuş idi, hâlâ meblağ-ı mahkûmun-bih merkūm doksan guruşu müvekkil-i mezbûr Ali Beşe bana edâ ve teslîm ben dahi yedinden ahz ve kabz edip ben kasaba-i mezbûrede vâki‘ lede’l-ahâlî ve’l-cîrân ma‘lûmü’l-hudûd kayıkhâne ve bir kıt‘a bağ da‘vâlarına ve bi’l-cümle târih-i kitâba gelince beynimizde cereyân eden sâir ahz u i‘tâ ve mu‘âmelât-ı şettâya müte‘allik âmme-i da‘vâdan ben mezbûr Ali Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt edip müvekkil-i mezbûr Ali Beşe dahi bana medfû‘u olan meblağ-ı mezbûra târih-i kitâba gelince beynimizde cereyân eden sâir ahz ü i‘tâ ve mu‘âmelât-ı şettâya müte‘allika âmme-i da‘vâdan benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi, târih-i kitâba gelince birbirimiz ile vicâhen mine’l-vücûh ve sebeben mine’l-esbâb da‘vâ ve nizâ‘ımız kalmadı dedikde mukırr-ı mezbûrun ber-vech-i muharrer cârî ve sâdır olan cemî‘-i kelimâtını vekîl-i mezbûr Yusuf Beşe vicâhen tasdîk ve tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-işrîn mine’l-Muharremi’l-harâm sene [1]108. Şuhûdü’l-hâl: Yusuf Odabaşı b. Süleyman, İbrahim Beşe b. Musli, Hüseyin Reis b. Ahmed, Mehmed Beşe b. Üveys, Mehmed Çelebi b. el-Hâc Receb.