İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 594 Hüküm no: 454 Orijinal metin no: [151b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serabyon, Papa Kirkor v. Kestosindi’ye ait arsadaki su kuyusunun kullanım hakkının kendisine ait olduğunu iddia etmişse de bunu ıspatlayamadığı Husûs-ı âti’l-beyânın mahâllinde ketb ü tahrîri bâbında fermân-ı âlî vârid olmağın imtisâlen- leh savb-ı şer‘-i enverden keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mârlardan Mustafa Halîfe b. Abdullah ve Ali Halîfe b. Abdülmennan ile mahmiye-i İstanbul’da Sulu Manastır kurbünde Abdi Çelebi mahallesinde vâki‘ bir tarafdan Papa Vartan nâm zimmî mülkü ve bir tarafdan Ağya nâm zimmî mülkü ve bir tarafdan Serabyun nâm zimmî mülkü ve bir tarafdan tarîk-i âm ile mahdûd işbu bâ‘isü’s-sifr Papa Kirkor v. Kestosindi nâm zimmînin menziline varıp zeyl-i vesîkada muharrerü’l-esâmî olan bî-garaz kimesneler mahzarında akd-i meclis-i şer‘-i mübîn eyledikde merkūm Serabyon meclis-i ma‘kūd-ı mezbûrda Papa Kirkor muvâcehesinde üzerine da‘vâ ve takrîr-i kelâm edip bundan akdem merkūm Papa Kirkor kendi menzilinde vâki‘ işbu mülk su kuyusundan ben intifâ‘ etmek üzere mârrü’z-zikr su kuyusunun hakk-ı şurbunu işbu menzilim arsasında mi‘mârân-ı mezbûrân mesâhaları üzere be-hesâb-ı terbî‘i on üç zirâ‘ arsa mukābelesinde bana bey‘ ve temlîk edip ben dahi ber-vech-i muharrer iştirâ ve temellük ve kabûl edip arsa-i mezkûreyi merkūm Kirkor’a def‘ ve teslîm etmekle merkūm Kirkor’un mârrü’z-zikr su kuyusunun hakk-ı şurbu mülk-i müşterâm iken hâlâ merkūm Kirkor zikrolunan kuyunun intifâ‘ından beni men‘ etmekle suâl olunup arsa-i mezkûreden kasr-ı yedine tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyene beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka ber-vech-i meşrûh kendi su kuyusundan intifâ‘ etmek üzere arsa-i mezkûre mukābelesinde mârrü’z-zikr su kuyusunun hakk-ı şurbunu müdde‘î-i mezbûra bey‘ ve temlîk etmeyip ol vechile müdde‘î-i mezbûrun mârrü’z-zikr kuyudan hakk-ı şurbu olmadığına yemîn teklîf olundukda ol dahi hasbe’l-mesûl yemîn billâhi’llezî ersele’l-İncîli alâ İsa -aleyhisselâm- etmeğin mûcebiyle bî-vech mu‘ârazadan men‘ eylediğini mevlânâ-yı mezbûr mahâllinde tahrîr ve ma‘an ba‘s olunan Mehmed b. İbrahim ve Yusuf b. Abdülmennan ile meclis-i şer‘a gelip alâ vukū‘ihî inhâ ve takrîr etmeğin ba‘de’t-tenfîz mâ-hüve’l-vâki‘ bi’t-taleb ketb olundu. Fi’l-yevm 28 mine’l-Muharremi’l-harâm sene [1]108. Şuhûdü’l-hâl: İbrahim Çelebi b. Mehmed, Mustafa Çelebi b. İbrahim, Yusuf b. Abdullah, İbrahim b. Mustafa, Asvador v. Marat, Kestosder v. Kirkor, Bağdasar v. Kirkor, Bogos v. Mardiros, Ağyad v. Avanos, Bağdasar v. Kestostor, Eremya v. Avanos.