İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 595 Hüküm no: 455 Orijinal metin no: [152a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruscuk’da sakin iken ölmüş olan Zefire bt. Yorgi’nin kocası Sava’nın terekenin bir kısmını sakladığına dair oğlu Dimitri’nin iddiası Vilâyet-i Rumeli’nde medîne-i Ruscuk’da sâkine iken bundan akdem hâlike olan Zefire bt. Yorgi nâm Nasrâniyenin verâseti zevc-i metrûkü Sava v. Yorgi nâm zimmî ile sadrî kebîr oğlu Dimitri nâm zimmîye münhasıra olduğu şer‘an zâhir ve müte‘ayyen oldukdan sonra mezbûr Dimitri’nin sulbî kebîr oğlu ve tarafından husûs-ı âti’z-zikre vekîl-i müsecceli olan Yorgi nâm zimmî Dîvân-ı kāimmakām-ı hazret-i sadrazamîde ma‘kūd-ı meclis-i şer‘-i şerîf-i âlîde râfi‘-i hâze’l-kitâb merkūm Sava muvâcehesinde üzerine da‘vâ ve takrîr-i kelâm edip mezbûre Zefire bundan akdem hâlik oldukda terekesinden inci düğmeli bir sandal kaftân ve altın düğmeli bir beyâz hatâyî kaftân ve bir süse kaftân ve iki sandal entâri ve bir zeytûnî ve dört gömlek ve bir sırmalı püskül ve on aded pişküni ve bir zenne sarık ve bir ferâce arakkiyye ve bir sırmalı don ve iki makrama ve bir dülbend gömlek ve bir mor çuka ferâce ve bir samur paçası kürk ve sekiz münakkaş duvar makraması ve iki peşkir ve bir münakkaş çarşaf ve yedi mantarî yasdık ve iki münakkaş bohça ve dört döşek ve yedi çarşaf ve sekiz minder çarşafı ve sekiz minder ve on sekiz yasdık ve iki tancere ve sekiz sahan ve iki tava ve bir sini ve bir baklava tepsisi ve bir leğen ma‘a ibrik ve altmış çini tabak ve üç çini maşraba ve bir tiftik kebe ve iki sepet sandığı ve iki ağaç sandık ve dört yorgan ve iki kebe ve altmış zirâ‘ iplik ve üç destgâh ve bir maşraba ve iki sîm kuşak ve iki çift inci küpe ve yirmi miskāl bir çift endise bilezik ve atmış miskāl bir çift cebe altın bilezik ve üç altın yüzüğünü mezbûre Sava ketm ü ihtifâ etmişdir, hâlâ suâl olunup eşyâ-i mezkûrenin a‘yânı mevcûd ise a‘yânından değil ise misli olanın misillerinden ve kıymeti olanın kıymet-i şer‘iyelerinden babam müvekkil-i mezbûra isâbet eden selâse-i erba‘ hisse-i şer‘iyesini bana red ve teslîme mezbûr Sava’ya tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda ityân-ı beyyineden ızhâr-ı acz ile istimhâl etmekle mehil-i şer‘î birle kirâren ve mirâren ba‘de’l-imhâl ityân-ı beyyineden ızhâr-ı acz ile istihlâf etmeğin fi’l-hakīka tereke-i hâlike-i mezbûreden bâlâda zikrolunan eşyâyı ahz ü ihfâ etmeyip ol vechile eşyâ-i mezkûrenin a‘yânı mevcûd ise a‘yânından değil ise misli olanın misilleri misli olmayanın müvekkil-i mezbûr Dimitri’nin selâse-i erbâ‘ı hissesinin red ve teslîmi üzerine lâzım geldiğine yemîn teklîf olundukda ol dahi hasbe’l-mesûl yemîn billâhi’llezî enzele’l-İncîl alâ İsa -aleyhisselâm- etmek mûcebiyle müdde‘î-i mezbûr bilâ-beyyine bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fî selh-i Muharremi’l-harâm sene [1]108. Şuhûdü’l-hâl: Umdetü erbâbü’t-tahrîr ve’l-kalem Tezkire-i evvel Yusuf Efendi, zübdetü ashâbi’t-tastîr ve’r-rakām Tezkire-i sânî Hâfız Efendi, Fahrü’l-eşbâh ve’l-emsâl ser-çavuşân Mehmed Ağa, Fahrü’l-akrân Muhzır Mehmed Ağa, el-Hâc Mehmed Çavuş Hasköylü, Balıkçızâde? Mehmed Çavuş, el-Hâc Halil Efendi b. Mehmed.