İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 596 Hüküm no: 456 Orijinal metin no: [152a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun bt. Receb’in, Atik Ali Paşa mahallesinden Elmas bt. Anuş tarafından darbedildiği iddiasını ispatlayamadığı Mahmiye-i İstanbul’da Karagümrük kurbünde sâkine olup zâtını ma‘rifet-i şer‘iye ile ârifân zevci es-Seyyid Mustafa Çelebi b. Mehmed ve Ahmed Çelebi b. Mehmed ta‘rîfleriyle mu‘arrefe olan Sâliha Hatun bt. Receb meclis-i şer‘-i şerîf-i enverde mahmiye-i mezbûrede Sultanhamamı kurbünde Ali Paşa-yı Atik mahallesi sâkinelerinden işbu râfi‘atü’l-kitâb Elmas bt. Avanos nâm Ermeniye muvâcehesinde üzerine da‘vâ ve takrîr-i kelâm edip mezbûre Elmas târih-i kitâbdan bir ay mukaddem zikrolunan Sultanhamamı dâhilinde hamam taşı ile bi’d-defa‘ât başıma ve belime amden ve kasden darb etmişdir, hâlâ suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘iye-i mezbûreden müdde‘âsına mutâbıka beyyine taleb olundukda ityân-ı beyyine için istimhâl etmekle mehil-i şer‘î birle kirâren ve mirâren ba‘de’l-imhâl ityân-ı beyyineden ızhâr-ı acz ile istihlâf etmeğin fi’l-hakīka târih-i kitâbdan bir ay mukaddem zikrolunan Sultanhamam’ında müdde‘iye-i mezbûre Sâliha Hatun’un başına ve beline amden ve kasden darb etmeyip ol vechile üzerinde müdde‘iye-i mezbûrenin hak takdîri olmadığına mezbûre Elmas’a yemîn teklîf olundukda ol dahi hasebi’l-mesûl yemîn billâhi’llezî enzele’l-incîli alâ İsa -aleyhisselâm- etmeğin mûcebiyle müdde‘iye-i mezbûre Sâliha bilâ-beyyine bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fî 3 min-Saferü’l-hayr sene [1]108. Şuhûdü’l-hâl: el-Hâc Halil Efendi, Mustafa Çelebi b. Mehmed, Mustafa b. Şaban el-Muhzır, İbrahim Çelebi b. Ahmed ressâm, Ali b. Bali el-Muhzır, Receb b. Osman el-Muhzır, Abdullah b. Abdullah, el-Hâc Mehmed b. İbrahim.