İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 597 Hüküm no: 457 Orijinal metin no: [152b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Selim’in Kahire’nin Bulak kasabasında bulunan evini Ahmed b. Perviz’e sattığı Mahmiye-i İstanbul’da Kâtib Hüsrev mahallesinde sâkin tüccârdan el-Hâc Mustafa b. el-Hâc Selim nâm kimesne meclis-i şer‘-i şerîf-i enverde mahmiye-i mezbûrede Hocapaşa mahallesinde sâkin yine tüccâr-ı zevi’l-iktidârdan işbu râfi‘u’l-kitâb el-Hâc Ahmed b. el-Hâc Perviz nâm kimesne mahzarında ikrâr-ı tâm ve takrîr-i kelâm edip mahrûse-i mısr-ı Kāhire müzâfâtından kasaba-i Bulak sevr’de? vâki‘ bir tarafdan Abdurrahim Çelebi arsası ve bir tarafdan el-Hâc Ahmed arsası ve iki tarafdan tarîk-i âm ile mahdûd birbirine faysal tahtânî yedi bâb mahzen ve yine tahtânî iki bâb oda ve fevkānî iki bâb oda ve dehliz ve tahtında matbah ve bi’r-i mâ ve havluyu müştemil menzilin arsası merhûm Hasan Paşa Vakfı’ndan olmağla arsa-i mezbûreyi vakf-ı mezbûr mütevellîsi olan Abdurrahim Çelebi nâm kimesneden bundan akdem yüz guruş icâre-i mu‘accele-i ve beher yevm birer para müeccele ile ba‘de’l-istîcâr ve’t-tesellüm hâlâ üzerinde mevcûd olan ebniye-i mezkûreyi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr el-Hâc Ahmed’e iki bin altmış altı guruşa bey‘ ve temlîk ve arsasını bâ-izn-i mütevellî meccânen ferâğ ve tefvîz edip ol dahi iştirâ ve temellük ve tefevvüz ve kabûl eyledikden sonra semeni olan meblağ-ı mezbûr iki bin altmış altı guruşu mezbûr el-Hâc Ahmed yedinden bi’t-tamam ahz u kabz ve tesellüm edip mebî‘-i mezbûru mahâllinde kabz ve tasarrufa tarafından mezbûr el-Hâc Ahmed’i taslît eyledim, fîmâ-ba‘d menzil-i mahdûd-ı mezbûrun ebniyesi mezbûr el-Hâc Ahmed’in mülk-i müşterâsı ve arsası dâhil-i havza-ı tasarrufu olmuşdur, benim asla alâka ve medhalim kalmadı, keyfe mâ yeşâ’ mutasarrıf olsun dedikde mukırr-ı mezbûr el-Hâc Mustafa’nın ber-vech-i muharrer cârî ve sâdır olan kelimâtını el-mukarru lehu’l-mezbûr el-Hâc Ahmed vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Saferü’l-hayr sene [1]108. Şuhûdü’l-hâl: el-Hâc Mehmed Ağa b. Sinan, Mehmed Çelebi b. Salih, Emrullah Celebi b. el-Hâc Cafer, el-Hâc Ömer b. el-Hâc İbrahim, Mehmed Çelebi b. el-Hâc Selim, el-Hâc Abdullah b. Nâzır, Hüseyin Çelebi b. Ali, Kuşadalı el-Hâc Ali, Kürkçü Ali Çelebi b. Ahmed, el-Hâc İbrahim b. Veli, el-Hâc Halil Efendi, el-Hâc Mehmed b. İbrahim, el-Hâc Ali Beşe Çukadâr, İbrahim Çelebi b. Ahmed, ? el-Hâc Ahmed b. ( ).