İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 599 Hüküm no: 459 Orijinal metin no: [153a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hammâmî Mustafa Bey b. Receb’in, Ahmed Küretünnühâs emini iken kendisini haksız yere dövdürüp parasını aldığı Fi’l-asl vilâyet-i Anadolu’da Kastamonu sancağında Küretünnühâs kasabasında Eşref mahallesi ahâlîsinden olup hâlâ mahmiye-i İstanbul’da Sart hamamı kurbünde müsâfiren sâkin işbu râfi‘u’l-kitâb Hammâmî Mustafa Bey b. Receb nâm kimesne şer‘-i şerîf-i enverde bin yüz iki senesi Şevvali’l-mükerreminde Küretünnühâs emîni olan el-Hâc Ahmed b. el-Hâc Mehmed nâm kimesne mahzarında üzerine da‘vâ ve takrîr-i kelâm edip târih-i mezbûrda merkūm el-Hâc Ahmed Küretünnühâs emîni iken senin oğlun Mehmed şakī ve şâribü’l-hamrdır deyü beni ahz ve darb ve bi-gayr-ı hakkın seksen altı guruşumu cebren ahz ve kabz ve kendi mesârifine sarfla istihlâk etmişdir, hâlâ suâl olunup meblağ-ı mezbûru bi-tarîkı’d-damân bana red ve teslîme mezbûr el-Hâc Ahmed’e tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda udûl-i Müslimîn’den olup fi’l-asl kasaba-i mezbûreden ve hâlâ mahmiye-i Karaman sûkunda sâkin İsmail Beşe b. el-Hâc Mehmed dergâh-ı âlî yeniçerilerinin on yedinci çerge odası ahâlîsinden Hasan Beşe b. Mehmed nâm kimesneler li-ecli’ş-şehâde meclis-i şer‘e hâzırân olup isre’l-istişhâd fi’l-hakīka bin yüz iki senesi Şevvali’l-mükerreminde merkūm el-Hâc Ahmed Küretünnühâs emîni iken senin oğlun Mehmed Beşe şakī ve şâribü’l-hamrdır deyü müdde‘î-i mezbûr Hammâmî Mustafa Bey’i ahz ve habs ve darb ve bi-gayr-ı hakkın seksen altı guruşunu bizim huzûrumuzda cebren ahz u kabz etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm ve’t-tenbîh mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Saferü’l-hayr li-sene seb‘a ve mie ve elf. Şuhûdü’l-hâl: Mustafa Beşe b. Ali, Ahmed Beşe b. İbrahim, Şahin b. Abdullah, Mehmed Çelebi b. Ahmed, Ali Beşe ser-çukadâr, Mustafa b. Mehmed, Receb b. Osman.