İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 602 Hüküm no: 461 Orijinal metin no: [154a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa b. Ahmed’de alacağı olduğuna dair İstanbul’da sâbık gümrük emini Dilaver Ağa b. Abdullah’ın iddiası Mahmiye-i İstanbul’da sâbıkā gümrük emîni olan Dilaver Ağa b. Abdullah Dîvân-ı kāimmakām-ı hazret-i sadrazamîde ma‘kūd-ı meclis-i şer‘-i şerîf-i âlîde mahmiye-i mezbûrede Nahılbend mahallesi sükkânından işbu râfi‘u’l-kitâb Mahmud Ağa b. Ahmed nâm kimesne mahzarında üzerine da‘vâ ve takrîr-i kelâm edip sadrazam oldukdan sonra medîne-i Edirne’de bin yüz altı senesinde maktûlen vefât eden merhûm Ali Paşa defterdâr iken gümrük emânetini sana ibkā etdireyim deyü malımdan altı bin guruşumu mezbûr Mahmud Ağa bi-gayr-ı hakkın ahz u kabz etmiş idi, hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Mahmud Ağa cevâbında müdde‘î-i mezbûr Dilaver Ağa meblağ-ı mezbûr altı bin guruşu mûmâ-ileyh Ali Paşa defterdâr iken kalemiyesi olmak üzere bana teslîm ben dahi mûmâ-ileyhin ev kethudâsı olmağla ba‘de’l-ahz mûmâ-ileyh Ali Paşa’ya def‘ ve teslîme bana emr ve tevkîl etmekle ben dahi mezbûr Dilaver Ağa’nın emrine binâen meblağ-ı mezbûr altı bin guruşu mûmâ-[ileyh] Ali Paşa’ya hayatında defterdâr olduğu hâlde tamamen def‘ ve teslîm edip meblağ-ı mezbûr mütâlebesinden zimmetim berî olmuşdur, hatta bin yüz yedi senesi Muharremi’l-harâmı selhinde mahmiye-i mezbûrede hâkimü’ş-şer‘i’ş-şerîf olan umdetü’l-mevâli’l-izâm Ataullah Mehmed Efendi huzûrunda müdde‘î-i mezbûr Dilaver Ağa tarafından meblağ-ı mezbûru taleb ve da‘vâya vekîl olduğu es-Seyyid Musa Çelebi b. es-Seyyid Hasan ve Mehmed b. Abdullah şehâdetleriyle şer‘an sâbit olan Süleyman Ağa b. Ahmed nâm kimesne meblağ-ı mezbûr altı bin guruşu benden bi’l-vekâle taleb ve da‘vâ eylediğinde ben dahi ber-vech-i meşrûh mûmâ-ileyh Ali Paşa’nın kalemiyesi olup mûmâ-ileyhe def‘ ve teslîm etmek için bana emâneten verip ve ber-vech-i mübeyyen mûmâ-ileyh emr ve tevkîl eyledi, ba‘dehû meblağ-ı mezbûru mezbûr Dilaver Ağa’nın emrine binâen mûmâ-ileyhe bi-aynihî def‘ ve teslîm eyledim deyü def‘ ile mukābele eylediğimde vekîl-i mezbûr Süleyman Ağa dahi meblağ-ı mezbûru müvekkili mezbûr Dilaver Ağa’nın vech-i mübeyyeni üzere bana emâneten verdiği ve ber-vech-i muharrer def‘ ve teslîme emr ve tevkîlini inkâr etmekle ben dahi müdde‘âmı udûl-i Müslimîn’den Ali Paşa-yı atîk mahallesi sükkânından el-Hâc Mehmed b. Abdullah ve Abdurrahman Ağa b. Abdullah şehâdetleriyle şer‘an ba‘de’l-isbât meblağ-ı mezbûr altı bin guruşu mûmâ-ileyh Ali Paşa’ya bi’t-tamam def‘ u teslîm edip yedimde bir habbesi bâkī kalmadığına tahlîf-i şer‘î ile tahlîf olunup vekîl-i mezbûr Süleyman Ağa bî-vech mu‘ârazadan şer‘an men‘ olunup yedime işbu hüccet-i şer‘iye verilmiş idi deyü da‘vâyı def‘ ve mûmâ-ileyh Ataullah Mehmed Efendi’nin imzâsıyla mumzât ve hatmiyle mahtûme ve târih-i mezkûr ile müverraha bir kıt‘a hüccet-i şer‘iye ibrâz edip feth ve kırâet olundukda mazmûnu min-külli’l-vücûh takrîr-i meşrûhuna muvâfık olmağın gıbbe’l-istintâk müdde‘î-i mezbûr Dilaver Ağa mazmûn-ı hüccet-i mezbûreyi bi’t-tav‘i’s-saf ikrâr ve i‘tirâf etmeğin mûcebince müdde‘î-i merkūm Dilaver Ağa bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâbi‘ min-Saferü’l-hayr sene [1]108. Şuhûdü’l-hâl: Mehmed Ağa Sekbânbaşı hâlâ, Mehmed ser-çavuşân hâlâ, Tezkire-i evvel Yusuf Efendi, Tezkire-i sânî Hâfız Efendi, Ali Ağa Kethudâ-yı bevvâbîn, Mehmed Ağa b. ( ), Süleyman Ağa Çavuş-ı sekbân, Hasköylü Mehmed Çavuş, İbrahim Emîn-i çavuşân, el-Hâc Halil Efendi tâbi‘-i hazretefendi.