İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 603 Hüküm no: 462 Orijinal metin no: [154a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi iken ihtidâ eden Hasan b. Abdullah, ortağı Aslan v. Bali’den ayrıldıktan sonra alacağı olduğunu iddia etmişse de aralarında alacak-verecek kalmadığı Mahrûse-i Galata’da Sultan Bâyezid mahallesinde sâkin Yahûdî olup küfrî hâlinde Bencas v. Hayes ismi ile müsemmâ olup hâlâ şeref-i İslâm ile müşerref olan Hasan b. Abdullah nâm mühtedî Dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i âlîde tâife-i yahud’un Selanik cemâ‘atinden işbu râfi‘u’l-vesîka Aslan v. Bali nâm Yahûdî muvâcehesinde üzerine da‘vâ ve takrîr-i kelâm edip bundan akdem mezbûr Aslan ile çukacılık san‘atında şerîkler olmağla beynimizde fesh-i akd-i şirket edip hesâb gördüğümüzde benim asl-ı mâlımdan mezbûr Aslan zimmetinde üç bin guruş hakkım zuhûr etmekle meblağ-ı mezbûrun iki bin üç yüz guruşunu yedinden ahz u kabz edip yedi yüz guruş hakkım bâkī kalmışdır, suâl olunup meblağ-ı mezbûr yedi yüz guruşu bana edâya mezbûr Aslan’a tenbîh olunmak matlûbumdur dedikde gıbbe’s-suâl mezbûr Aslan cevâbında bin yüz üç senesi Cumâdelâhiresi’nin dokuzuncu günü ba‘de fesh-i akdi’ş-şirket beynimizde hesâb gördüğümüzde her birimiz asl-ı mâl ve fâideden [154b] hisse-i şer‘iyesini tamamen ahz u kabz edip târih-i mezbûra gelince beynimizde cereyân eden ahz ü i‘tâ ve mu‘âmelât-ı şettâya müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt edip hatta târih-i mezbûrda medîne-i Edirne’de nâibü’ş-şer‘ olan Mehmed Efendi b. Abdülaziz huzûrunda ber-vech-i muharrer asl-ı mâl ve fâideden her birimiz hissesini ahz ü kabz edip târih-i mezbûra gelince beynimizde cereyân eden ahz ü i‘tâ ve mu‘âmelât-ı şettâya müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediğimizi ikrâr ve i‘tirâf etmekle işbu hüccet-i şer‘iye dahi tahrîr olunmuş idi deyü da‘vâyı def‘ ve mûmâ-ileyh Mehmed Efendi’nin imzâsıyla mumzât ve hatmiyle mahtûme ve târih-i mezkûr ile müverraha ve mazmûnu min-külli’l-vücûh takrîr-i meşrûhuna muvâfık bir kıt‘a hüccet-i şer‘iye ibrâz etmeğin gıbbe’l-istintâk müdde‘î-i mezbûr Hasan cevâbında mazmûnu hüccet-i mezbûreyi bi’t-tav‘i’s-sâf ikrâr ve i‘tirâf etmeğin alâ mûceb-i i‘tirâfihî müdde‘î-i mezbûr Hasan bî-vech mu‘ârazadan men‘ olunup mâ vak‘a bi’t-taleb ketb olundu. Fî 7 min-Saferü’l-hayr sene [1]108. Şuhûdü’l-hâl: Mehmed Ağa ser-çavuşân, Tezkire-i evvel Yusuf Efendi, Tezkire-i sânî Hâfız Mehmed Efendi, Mehmed Ağa ser-muhzırân, el-Hâc Mehmed Çavuş, İbrahim Çavuş, Mustafa Efendi nâib-i recül, el-Hâc Ali Beşe Çukadâr.