İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 604 Hüküm no: 463 Orijinal metin no: [154b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Subaşı hasekisi Hüseyin Beşe b. Abdullah’ın Yenibahçe yakınındaki Karabaş mahallesinden Emetullah bt. Osman’dan haksız yere aldığı parayı ödemesi Mahmiye-i İstanbul’da Yenibahçe kurbünde Karabaş mahallesi sâkinelerinden olup zâtı ma‘rifet-i şer‘iye ile ârifân Ahmed Beşe b. Süleyman ve diğer Ahmed Beşe b. Ali ta‘rîfleriyle mu‘arrefe olan bâ‘isetü’l-kitâb Emetullah bt. Osman nâm hatun meclis-i şer‘-i şerîf-i enverde hâlâ subaşı hasekisi olan Hüseyin Beşe b. Ahmed mahzarında üzerine da‘vâ edip mezbûr Hüseyin târih-i kitâbdan bir sene mukaddem mahmiye-i mezbûrede subaşı olan Balizâde Ahmed Çavuş yanında haseki olmağla târih-i mezbûrda gümüş suyu bey‘ eder imişsin deyü bi-gayr-ı hakkın beni ahz u habs etdiklerinden sonra benden dahi bi-gayr-ı hakkın seksen iki buçuk guruş ile dokuz bin yedi yüz akçe kıymetli sırma işleme bir yorganımı ahz u kabz etmekle hâlâ suâl olunup meblağ-ı mezbûr ile zikrolunan yorganı aynı mevcûde ise aynını müstehlek ise ba‘de’s-sübût kıymet-i şer‘iyesini bana teslîme tenbîh olunmak matlûbumdur dedikde gıbbe’s-suâl mezbûr Hüseyin Beşe cevâbında fi’l-hakīka târih-i mezbûrda vech-i meşrûh üzere müdde‘iye-i mezbûreyi habs ve bi-gayr-ı hakkın ancak altmış üç guruşunu ahz u kabz etmiş idim deyü ikrâr ve ziyâdeyi inkâr edicek müdde‘iye-i mezbûreden ziyâde da‘vâsına beyyine taleb olundukda ityân-ı beyyine için istimhâl etmeğin mehil-i şer‘î ile imhâl olundukdan sonra mezbûr Hüseyin Beşe’nin ikrârı mertebesi olan meblağ-ı mezbûr altmış üç guruşu müdde‘iye-i mezbûreye edâ ve teslîme mezbûr Hüseyin Beşe’ye ba‘de’t-tenbîh mâ vaka‘a bi’t-taleb ketb olundu. Fî 3 min-Saferü’l-hayr sene [1]108. Şuhûdü’l-hâl: Fahrü’l-kuzât Mustafa Efendi nâib-i recül, Fahrü’l-müderrisîni’l-kirâm Ahmed Efendi, Ahmed Beşe b. Ali el-mübâşir, Mehmed Çelebi.