İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 607 Hüküm no: 465 Orijinal metin no: [155b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım b. Ahmed ile İbrahim Ağa b. Mehmed’in birbirlerinin zimmetlerini ibra etdikleri Mahmiye-i İstanbul’da Validehanı’nda sâkin Kasım b. el-Hâc Ahmed nâm kimesne meclis-i şer‘-i şerîf-i enverde hân-ı mezbûrda sâkin Berdeberozâde? demekle şehîr işbu râfi‘u’l-kitâb İbrahim Ağa b. el-Hâc Mehmed mahzarında ikrâr-ı tâm ve takrîr-i kelâm edip mezbûr İbrahim Ağa zimmetinde cihet-i deyn-i şer‘îden otuz guruş hakkım vardır deyü meblağ-ı mezbûr yüz otuz guruşu mezbûr İbrahim Ağa’dan taleb ve da‘vâ eylediğimde beynimizde münâza‘ât-ı kesîre cereyân etmiş idi. El-hâletü-hâzihî meblağ-ı mezbûra ve târih-i kitâba gelince beynimizde cereyân eden sâir ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve muhâsamât ve eymân ve mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik, min-ba‘d târih-i kitâba gelince birbirimiz ile vechen mine’l-vücûh ve sebeben mine’l-esbâb da‘vâ ve nizâ‘ımız kalmadı dedikde mukırr-ı mezbûr Kasım’ın ber-vech-i muharrer cârî ve sâdır olan kelimâtını el-mukarru lehu’l-mezbûr İbrahim Ağa vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’t-târihi’l-mezbûr fî 5 min-Saferü’l-hayr. Şuhûdü’l-hâl: eş-Şâhidûnü’s-sâbıkūn.