İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 608 Hüküm no: 466 Orijinal metin no: [155b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccardan İbrahim Ağa b. Mehmed ile dayısı Mansur b. Abdullah’ın birbirlerinin zimmetlerini ibra etdikleri Mahmiye-i İstanbul’da Vâlidehânı’nda sâkin Berozâde? demekle şehîr tüccârdan İbrahim Ağa b. el-Hâc Mehmed’in dayısı el-Hâc Mansur b. Abdullah nâm kimesne meclis-i şer‘-i şerîf-i enverde işbu râfi‘u’l-kitâb mezbûr İbrahim Ağa mahzarında ikrâr-ı tâm ve takrîr-i kelâm edip bundan akdem mezbûr İbrahim Ağa zimmetinde hat ve hatmini hâvî bir kıt‘a deyn temessükü nâtık olduğu üzere cihet-i karz-ı şer‘îden sekiz bin beş yüz guruş hakkım olmağla merkūm İbrahim Ağa meblağ-ı mezbûr sekiz bin beş yüz guruş ile beni karındaşı işbu hazır bi’l-meclis el-Hâc Hüseyin Ağa üzerine havâle-i sahîha ile havâle edip her birimiz dahi havâle-i mezbûreyi kabûl eylediğimizden sonra mezbûr el-Hâc Hüseyin Ağa meblağ-ı merkūm sekiz bin beş yüz guruşu min-ciheti’l-havâleti’l-mezbûre bana def‘ ve teslîm ben dahi ahz u kabz ve istifâ edip min-ba‘d meblağ-ı mezbûrdan mezbûrân İbrahim Ağa ve el-Hâc Hüseyin Ağa zimmetlerinde bir akçe ve bir habbe hakkım bâkī kalmayıp ben târih-i kitâba gelince beynimizde cereyân eden sâir ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan ancak merkūm İbrahim Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt edip mezbûr İbrahim Ağa dahi mukaddemâ sen Trablus’a gitdikde benden istidâne etmiş idin deyü iddi‘âsı olan ma‘lûmü’l-mikdâr meblağa ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan benim zimmetimi ibrâ-âmm ile ibrâ ve ıskāt eyledi, min-ba‘d birbirimiz ile da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 5 min-Safer fi’t-târihi’l-mezbûr. Şuhûdü’l-hâl: eş-Şâhîdûnü’s-sâbıkūn.