İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 608 Hüküm no: 467 Orijinal metin no: [156a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hüseyin Ağa’nın azadlısı Hasan b. Abdullah ile İbrahim Ağa b. Mehmed’in birbirlerinin zimmetini ibra ettikleri
Mahmiye-i İstanbul’da Vâlidehânı’nda sâkin Berdebarozâde el-Hâc Hüseyin Ağa’nın mu‘takı Hasan b. Abdullah nâm kimesne meclis-i şer‘-i şerîf-i enverde mezbûr el-Hâc Hüseyin Ağa’nın birâderi işbu râfi‘u’l-kitâb İbrahim Ağa b. el-Hâc Mehmed Ağa mahzarında üzerine da‘vâ ve takrîr-i kelâm edip bundan akdem malımdan işbu hazır bi’l-meclis Kasım b. el-Hâc Ahmed’e iki bin dört yüz guruşumu bi-tarîkı’l-emânet def‘ ve teslîm eylediğimde mezbûr İbrahim Ağa meblağ-ı mezbûru merkūm Kasım yedinden bi-gayr-ı hakkın ahz u kabz ve kendi mesârifine sarfla istihlâk etmişdir deyü meblağ-ı mezbûr iki bin dört yüz guruşu mezbûr İbrahim Ağa’dan taleb ve da‘vâ eylediğimde ol dahi cevâbında sen hân-ı mezbûrda olan odama girip peştahtam içinde mevcûd temessükâtımı bi-gayr-ı hakkın ahz ve medîne-i Diyârbekir’de mu‘takım merkūm el-Hâc Hüseyin Ağa’ya irsâl eyledin deyü benden taleb ve da‘vâ eyledikde beynimizde münâza‘ât-ı kesîre cereyân etmiş idi. El-hâletü-hâzihî husûs-ı mezbûra ve târih-i kitaba gelince beynimizde cereyân eden sâir ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve muhâsamât ve eymân ve mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik min-ba‘d târih-i kitâba gelince birbirimiz ile vechen mine’l-vücûh da‘vâ ve nizâ‘ ve husûmetimiz kalmadı dedikde mukırr-ı mezbûr Hasan’ın ber-vech-i muharrer cârî ve sâdır olan kelimâtını el-mukarru lehu’l-mezbûr İbrahim Ağa vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu.
Fî 5 min-Saferü’l-hayr sene [1]108.
Şuhûdü’l-hâl: eş-Şâhidûnü’s-sâbıkūn.
|