İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 609 Hüküm no: 468 Orijinal metin no: [156a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beyzâde Mahmud Efendi Vakfı’na ait olan Koğacızâde mahallesindeki evin değerinin kırk altı bin dört yüz akçe olarak tahmin edildiği Husûs-ı âti’z-zikrin mahâllinde ketb ü tahrîri için sâdır olan fermân-ı şerîfe imtisâlen savb-ı şer‘den irsâl olunan İbrahim Efendi b. Mehmed ol dahi hâssa mi‘mârlardan es-Seyyid Mustafa Halîfe b. Eyüb ve zeyl-i kitâbda muharrerü’l-esâmî ile mahmiye-i İstanbul’da Kovacızâde mahallesinde vâki‘ sâbıkā Rumeli kazaskeri olan a‘lemü’l-ulemâi’l-izâm efdalü’l-fudalâi’l-fihâm keşşâfü’l-müşkilâti’d-dîniye hallâlü’l-mufassalâti’l-yakīniye yenbû‘u’l-fezâil ve’l-ma‘âlî metbû‘i’l-efâzıl ve’l-e‘âlî miftâhu künûzi’l-hakāyık messâhu rumûzi’d-dekāyık müstahsilü ulûmü’l-Arabiyye müstekmilü fünûni’l-edebiye sa‘âdetlü Mirza Mustafa Efendi hazretlerinin sa‘âdethânelerine varıp akd-i meclis-i şer‘-i nebevî eyledikde müşârun-ileyh hazretleri meclis-i ma‘kūd-ı mezbûrda mahalle-i mezbûrede vâki‘ merhûm Beyzâde Mahmud Efendi Vakfı’na hâlâ meşrûtiyyet üzere mütevellî olan Osman Efendi b. Muzaffer mahzarında takrîr-i kelâm ve ta‘bîr ani’l-merâm edip mütevellî-i mezbûr Osman Efendi’nin mütevellîsi olduğu vâkıf-ı mezbûrun evkāfı mülhakātından icâre-i mu‘accele ve yevmî ikişer akçe müeccele ile taht-ı tasarrufumda olup mahalle-i mezbûrede vâki‘ bir tarafdan tarîk-i hâs ve iki tarafdan benim âhar menzilim arsası ve matbahı ve bir tarafdan tarîk-i âm ile mahdûd hâriciye ve dâhiliyede köhne fevkānî beş bâb oda ve iki sofa ve ahır ve mağsel ve kenîf ve matbah ve havluyu müştemil menzil mürûr-ı eyyâm ile müşrif-i harâb olmağla mütevellî-i mezbûrun muvâcehesinde arsasının mikdârı keşf ve üzerinde olan köhne ebniyesi tahmîn-i sahîh ile tahmîn ve takvîm olunmak matlûbumdur dedikde gıbbe’t-tasdîkı’ş-şer‘î kazıyye minvâl-i muharrer üzere olduğu ba‘de’l-mu‘âyene ve’l-müşâhede mi‘mâr-ı mezbûr cümle muvâcehelerinde menzil-i mezbûrun evvelen arsasını mesâha etdikde tûlen ve arzen bi-hesâb-ı terbî‘î iki yüz yetmiş zirâ‘ arsası olduğu müte‘ayyen oldukdan sonra zikrolunan arsa üzerinde vâki‘ köhne ebniyesi sâniyen mesâha olundukda bi-hesâb-ı terbî‘î iki yüz otuz zirâ‘ köhne ebniyesi olup beher zirâ‘ı yüz altmış akçeden otuz altı bin sekiz yüz akçe ve yine be-hesâb-ı terbî‘î iki yüz kırk zirâ‘ köhne taş duvarın kırkar akçeden dokuz bin altı yüz akçe ki min-haysü’l-mecmû‘ kırk altı bin dört yüz akçeye bâliğ olup ebniye-i mezbûrenin el-yevm meblağ-ı mezbûrdan ziyâde tahammülü yokdur deyü mi‘mâr-ı mezbûr ve sâir ebniye ve sukūf ahvâline ıttılâ‘-ı tâmmı olan bî-garaz Müslimîn icmâ‘ ve ittifâk etdiklerini mevlânâ-yı mezbûr mahâllinde ketb ü tahrîr ba‘dehû ma‘an irsâl olunan Ali b. Bali ve Mustafa b. Şaban ile meclis-i şer‘e gelip alâ vukū‘ihî inhâ ve tahrîr etmeğin mâ vaka‘a bi’t-taleb ketb olundu. Fî 16 min-Saferü’l-hayr sene [1]108. Şuhûdü’l-hâl: Hasan Efendi b. Mustafa, Mehmed Efendi b. İbrahim, Nasuh Efendi b. Mehmed, İsmail Efendi b. Abdüsselam, Çukadâr el-Hâc Süleyman b. Abdullah, el-Hâc Abdullah Beşe b. Mehmed, Mehmed Çelebi b. Mehmed, Mustafa Efendi Kethudâ b. Mustafa, Fahrü’l-müderrisîn es-Seyyid Ömer Efendi, İbrahim Çelebi b. Ahmed, Ali b. Bali, Hasan b. Hüseyin.