İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 613 Hüküm no: 471 Orijinal metin no: [157a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat etmiş olan Hasan b. Mehmed’den kalan Şeyh Muhyiddin Kocavî mahallesindeki evin çocukları Mehmed ile Râbia arasında paylaştırıldığı Husûs-ı âti’z-zikrin mahâllinde keşf ve tahrîri için buyruldu-yı şerîf sâdır olmağla kıbel-i şer‘den keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mârlardan Üstâd Mustafa Halîfe b. Eyüb ile mahmiye-i İstanbul’da Şeyh Muhyiddin Kocavî mahallesinde vâki‘ bir tarafdan Hacı Bakır menzili ve bir tarafdan Mustafa Efendi menzili ve bir tarafdan Hacı Hüseyin menzili ve bir tarafdan tarîk-i âm ile mahdûd olup dâhilen ve hâricen fevkānî üç bâb oda ve bir sofa ve vustâda iki oda bir sofa ve bir matbah ve dehliz ve tahtânî bir oda ve mahzen ve bi’r-i mâ ve kenîf ve bahçeyi muhtevî menzile varıp zeyl-i vesîkada muharrerü’l-esâmî ebniye ve sukūf ahvâline ıttılâ‘-ı tâmmı olan Müslimîn [157b] huzûrlarında akd-i meclis-i şer‘-i nebevî eyledikde menzil-i mahdûd-ı mezbûr yedinde mülkü ve hakkı iken bundan akdem vefât eden el-Hâc Hasan b. Mehmed’in verâseti zevce-i metrûkesi Ümmühani bt. Mehmed ile sulbî kebîr oğulları Mehmed ve Yakub ve sulbiye kebîre kızı Râbia’ya münhasıra olup kable’l-kısmet mezbûre Ümmühani dahi fevt olup verâseti sadrî oğulları mezbûrân Mehmed ve Yakub’a ve sadriye kızı merkūme Râbia’ya münhasıra olup ba‘dehâ mezbûr Yakub dahi fevt olup verâseti li-ebeveyn er karındaşı mezbûr Mehmed ile kız karındaşı merkūme Râbia’ya münhasıra ve tashîh-i meseleleri bi-tarîkı’l-münâsahati’ş-şer‘iye yüz yirmi sehimden i‘tibâr olunup sihâm-ı mezbûreden seksen sehimi mezbûr Mehmed’e ve kırk sehimi dahi mezbûre Râbia’ya isâbet eylediği şer‘an zâhir oldukdan sonra mezbûre Râbia’nın zevci ve tarafından husûs-ı âti’z-zikre vekîli olduğu zât-ı mezbûreyi ma‘rifet-i şer‘iye ile ârifân Mustafa Çelebi b. Hüseyin ve Mustafa Efendi b. Halil şehâdetleriyle şer‘an sâbit olan Mustafa Çelebi b. Mehmed meclis-i ma‘kūd-ı mezbûrda müvekkile-i mezbûrenin karındaşı merkūm Mehmed mahzarında bi’l-vekâle takrîr-i kelâm ve ta‘bîr ani’l-merâm edip mûrisimiz müteveffâ-yı mezbûr Hacı Hasan’ın terekesinden olan işbu mülk menzilin tashîh-i mezbûr üzere seksen sehimi mezbûr Mehmed’in ve kırk sehimi dahi müvekkilem mezbûre Râbia’nın mülk-i mûrisi olup kābil-i taksîm olmağla müvekkilem mezbûre Râbia’ya isâbet eden sülüs hissesi ifrâz olunmak bi’l-vekâle murâdımdır dedikde gıbbe’t-tasdîkı’ş-şer‘î mi‘mâr-ı merkūm menzil-i mezbûru mesâha eyledikde tûlen ve arzen bi-hesâb-ı terbî‘î yüz seksen zirâ‘ binâ ma‘a’l-arsa ve yüz otuz sekiz zirâ‘ arsa-i hâliyeden müvekkile-i mezbûre Râbia’ya altmış zirâ‘ binâ ma‘a’l-arsa ve kırk altı zirâ‘ arsa-i hâliye isâbet eylediği zâhir ve nümâyân olmağla hâriciyede vâki‘ fevkānî bir oda ve tahtânî bir oda merkūm Mehmed müvekkile-i mezbûre Râbia’ya beş bin altmış akçe reddetmek üzere müvekkilem mezbûre Râbia’nın hissesini bi’t-terâzi ta‘yîn ve alâmât-ı fâsıla vaz‘ olunup ve dâhiliyede vâki‘ sâir büyût-ı adîde-i mezkûre ve arsa-i hâliye mezbûr Mehmed’in hissesi ta‘yîn ve alâmât-ı fâsıla vaz‘ olunup arsa-i hâliye-i mezbûreden merkūm Mehmed’e ziyâde geçip her zirâ‘ına yüz akçe takvîm olunan elli buçuk zirâ‘ arsanın kıymeti olan beş bin altmış akçeyi mezbûre Râbia’ya merkūm Mehmed red ve teslîm etmek üzere her biri hisselerini kabûl ve kabz eylediklerini mûmâ-ileyh Abdullah Efendi mahâllinde tahrîr ba‘dehû ma‘an ba‘s olunan Mehmed b. İbrahim ve Yusuf b. Abdullah ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fî 4 min-Saferü’l-hayr sene [1]108. Şuhûdü’l-hâl: Ahmed Efendi b. Mehmed el-imâm, el-Hâc Ömer b. Receb, Hasan b. Yusuf, Mustafa Çelebi b. Hüseyin, Mustafa Çelebi b. Halil, Osman Efendi b. Şaban.