İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 614 Hüküm no: 472 Orijinal metin no: [157b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi b. Osman’ın Receb Çorbacı Vakfı’ndan aldığı borç konusunda vakıf mütevellisi ile birbirlerinin zimmetlerini ibra ettikleri Mahmiye-i İstanbul’da Karabaş mahallesinde vâki‘ merhûm Receb Çorbacı Vakfı’na evlâdiyet ve meşrûtiyyet üzere bi’l-fi‘il mütevellî olan el-Hâc Mehmed nâm kimesne meclis-i şer‘-i şerîf-i enverde mahmiye-i mezbûrede Emir Buhârî mahallesinde sâkin işbu râfi‘u’l-kitâb Ömer Çelebi b. Osman nâm kimesne mahzarında bi’t-tevliye ikrâr ve takrîr-i kelâm edip târih-i kitâbdan on dört sene mukaddem mütevellîsi olduğum babamız mezbûr Receb Çorbacı nukūd-ı mevkūfesinden mezkûr Ömer Çelebi’ye iki yüz guruş ikrâz ve teslîm ol dahi iktirâz ve kabz edip zikrolunan Emir Buhârî mahallesinde vâki‘ merhûm el-Hâc Ebûbekir Vakfı’ndan icâre-i mu‘accele ve beher mâh on beşer akçe ücret-i müeccele ile taht-ı tasarrufunda olan ma‘lûmü’l-hudûd menzilini meblağ-ı mezbûr iki yüz guruş mukābelesinde ferâğ bi’l-vefâ ile bâ-izn-i mütevellî bana ferâğ ve tefvîz eyledikden sonra bilâ-devr-i şer‘î deyn-i mezbûra mahsûben mezbûr Ömer Çelebi beher sene otuz guruşdan on üç senede bana üç yüz doksan guruş def‘ ve teslîm ben dahi ahz u kabz etmiş idim, hâlâ mezbûr Ömer Çelebi ber-vech-i muharrer on üç senede bana medfû‘u olan üç yüz doksan guruşun iki yüz guruşunu asl-ı mal-ı mezbûra takās ve mâ‘adâsı olan yüz doksan guruş ile menzil-i mezbûru benden taleb ve da‘vâ etmekle beynimizde münâza‘ât-ı kesîre cereyân etmiş idi. El-hâletü-hâzihî asl-ı mal-ı mezbûr iki yüz guruşu cânib-i vakfa ben zâmin olmak üzere makbûzum olan meblağ-ı mezbûr üç yüz doksan guruşun iki yüz guruşunu ber-vech-i mübeyyen kendüye ikrâz eylediğim iki yüz guruşa takās ve menzil-i mezbûru bâ-izn-i mütevellî yine merkūm Ömer Çelebi ferâğ ve tefvîz edip mezbûr Ömer Çelebi dahi mukās ve tefevvüz ve kabûl ve mâ‘adâ medfû‘u olan yüz doksan guruşa müte‘allik âmme-i da‘vâdan taraf-ı vakfı ve benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-aşer min-Saferü’l-hayr sene [1]108. Şuhûdü’l-hâl: Abdullah Efendi b. Mehmed Efendi, Mehmed Efendi b. Receb, Abdurrahman Beşe b. Hanefî, es-Seyyid Mehmed Efendi b. Receb, İsmail Çelebi b. el-Hâc Sefer, Hüseyin b. Abdullah, Muharrem Efendi b. Ali, Hüseyin Çavuş b. Sinan, Ahmed Bey b. Mehmed, Ahmed Çelebi b. Hüseyin.